Afganski hælisleitandinn, Abdolhamid Rahmani, hefur verið sendur úr landi til Grikklands. Stundin greindi frá því á fimmtudaginn að Abdolhamid Rahmani væri á átjánda degi hungurverkfalls og herma heimildir Stundarinnar að hann sé nú á tuttugasta og þriðja degi.
Í fyrrakvöld sótti lögreglan Abdolhamid á heimili sitt og færði hann í fangaklefa lögreglu þar sem hann gisti um nóttina. Í gærmorgun var hann sendur úr landi. Þetta staðfestir lögfræðingur Abdolhamid.
Gisti í fangaklefa
Vinur Abdolhamid segir að lögreglan hafi komið um kvöldið án þess að gera boð á undan sér. „Allt í einu voru þrír lögregluþjónar komnir inn á heimilið. Þeir virtust ekki vita hvar Abdolhamid væri svo þeir bönkuðu á svefnherbergin í húsinu þangað til þeir fundu hann,“ segir vinur Abdolhamid sem býr í félagslegu húsnæði fyrir hælisleitendur á vegum Reykjavíkurborgar.
„Þegar hann var sendur burt var hann enn í hungurverkfalli.“
Herbergisfélaginn vill ekki koma fram undir nafni því hann óttast að það gæti haft áhrif á umsókn sína um hæli á Íslandi. Í samtali við Stundina segir hann atburðarásina hafa verið afar átakanlega: „Lögregluþjónarnir biðu meðan Abdolhamid pakkaði öllu dótinu sínu niður í tösku og tóku hann svo á brott með sér. Ég var í samskiptum við þá því Abdolhamid talar hvorki ensku né íslensku. Ég bað þá um að gefa honum smá tíma til að hringja í vini sína en þeir neituðu - sögðust geta gert það niðri á stöð. Við höfum verið í litlu sambandi við hann síðan, en í gærmorgun um klukkan sex sendi hann mér sms-skilaboð. Hann sagðist hafa gist í fangaklefa og væri á Keflavíkurflugvelli þar sem hann myndi brátt fara um borð í vél til Grikklands. Þegar hann var sendur burt var hann enn í hungurverkfalli,“ segir herbergisfélagi Abdolhamid í samtali við Stundina.
Lög um útlendinga sem tóku gildi 1. janúar 2017 veita lögreglunni rúma heimild um verklag þegar hælisleitendur eru sendir úr landi. Ef grunur liggur á að viðkomandi muni reyna að forðast brottvísun er því heimilt að láta hælisleitanda gista í fangaklefa lögreglu.
Vildi byggja sér upp líf
Abdolhamid sagði í samtali við Stundina í seinustu viku að hungurverkfallið væri hans eina leið til að mótmæla stöðu sinni. „Ég fór frá Grikklandi því ég var hræddur um líf mitt. Bróðir minn var myrtur í Tyrklandi í janúar af óvinum fjölskyldunnar og ég var hræddur um að það sama myndi gerast fyrir mig, og muni gerast ef ég verð sendur aftur til Grikklands,“ sagði Abdolhamid.
Abdolhamid sótti um hæli við komuna til landsins. Hann fékk synjun frá Útlendingastofnun á grundvelli Dyflinnarreglugerðarinnar og kærunefnd útlendingamála hefur staðfest þá synjun. Þá leitaði hann til lögmanns sem sótti um frestun réttaráhrifa á meðan málið færi fyrir dómstóla hér á landi en þeirri beiðni var einnig synjað. „Áður en ég fékk þessa þriðju synjun virtist lífið vera á uppleið,“ segir Abdolhamid, sem er múrari og vildi byggja sér upp líf hér og fara að vinna.
Vinir Abdolhamid Rahmani hafa ekkert heyrt frá honum síðan klukkan sex í gærmorgun en hvorki þeir, né hann, vita nokkuð um hver framtíð hans verður.
1.130 manns sóttu um vernd á Íslandi í fyrra, eða þrefalt fleiri en árið 2015. 313 manns voru flutt úr landi með lögreglufylgd á árinu, samkvæmt tölum Útlendingastofnunar.
Athugasemdir