Forsætisráðherra segist ekkert hafa séð því til fyrirstöðu að taka við nýjum mjólkurfernum MS við athöfn í anddyri Alþingishússins á föstudag. Hún hafi verið beðin um það af afmælisnefnd fullveldis Íslands enda sé fullveldisafmælið ekki einkaeign ríkisins, heldur þjóðarinnar allrar og einnig einkaaðila.
Þorgerður Katrín Gunnarsdóttir, formaður Viðreisnar, vakti athygli á málinu í óundirbúnum fyrirspurnum á Alþingi í gær. Sat Katrín Jakobsdóttir forsætisráðherra fyrir svörum.
„Við sem hér störfum vitum að reglan er sú að húsið er ekki notað til kynningar á vörum og hafa mörkin þar verið nokkuð skýr,“ sagði Þorgerður Katrín. „Úr varð þessi fína ljósmynd af forsætisráðherra með mjólkurfernurnar góðu fyrir framan málverk af Jóni forseta. Aðspurður segir síðan skrifstofustjóri Alþingis að ekki sé um neina vörusýningu eða vöruauglýsingu að ræða heldur fyrst og fremst atburð sem tengist hátíðardagskránni. Gott og vel. Þá hlýt ég að spyrja: Getur hvaða fyrirtæki sem er útbúið nýjar umbúðir í tilefni af fullveldisafmælinu og fengið forsætisráðherra til að sitja fyrir og auglýsa þannig vörurnar?“
Þorgerður Katrín benti á að MS sé í „svokallaðri“ samkeppni við aðra framleiðendur mjólkurafurða og hafi verið dæmt vegna samkeppnisbrota á árinu. „Þótt þessi uppákoma endurspegli í raun ákveðna einokunarstarfsemi á mjólkurmarkaði, sem kemur ekki á óvart miðað við stefnu ríkisstjórnarinnar, er það umhugsunarefni. Hvernig er það metið hvort þetta sé gert í markaðslegum tilgangi eða ekki? Það er alþekkt að nýta svona leiðir til markaðssetningar, t.d. með áhrifavöldum. Þeir sem mættu í anddyri til að afhenda vöruna voru einmitt forstjóri Mjólkursamsölunnar, sá góði maður, markaðsstjóri og markaðsfulltrúar. En var þetta ekki í markaðslegum tilgangi?“
Hefði þurft að merkja myndina #samstarf
Þorgerður Katrín sagði það vera ljóst að um dulda auglýsingu væri að ræða. „Hvað kostar klukkustund með forsætisráðherra, líklega mesta áhrifavaldi landsins? Er virkilega ekki um dulda auglýsingu að ræða? Hefði mögulega átt að setja undir myndina #samstarf, eins og Neytendastofa hefur ítrekað bent á að sé nauðsynleg forsenda þess að neytendur átti sig á hvort um dulda auglýsingu sé að ræða eða ekki?“
Hún spurði í framhaldinu hvar draga eigi mörkin þegar kemur að því að nota þinghúsið sem auglýsingavettvang. „Mun þá forsætisráðherra ekki fetta fingur út í það ef þessi fullveldisnefnd kemur aftur með tillögur?“ spurði Þorgerður Katrín. „Við erum til dæmis með frábæra bjórframleiðendur víða um land. Verður þinghúsið vettvangur fyrir auglýsingu á fullveldisbjór? Eða eigum við að tala um fullveldiskleinur? Við erum með marga frábæra framleiðendur að kleinum, góða bakara, sem geta alveg örugglega bakað fullveldiskleinur.“
Viðreisn eigi fulltrúa í afmælisnefndinni
Katrín svaraði því til að hún hafi fengið óskina frá afmælisnefndinni og kannað í kjölfarið hvort leyfi hafi verið veitt af hálfu Alþingis. „Ég hef skilið markmið afmælisnefndarinnar sem svo að fullveldisafmælið sé ekki einkaeign ríkisins heldur þjóðarinnar allrar og þau hafa því hvatt meðal annars einkafyrirtæki til að koma að hátíðahöldum,“ sagði Katrín. „Þar sem ég hef tekið þátt í óteljandi viðburðum á þessu afmælisári tengdum fullveldinu, bæði með einkafyrirtækjum, frjálsum félagasamtökum og stofnunum, sá ég í í sjálfu sér ekkert því til fyrirstöðu að veita þessum mjólkurfernum viðtöku.“
Katrín benti á að í afmælisnefndinni sitji fulltrúar allra flokka á þingi, þar á meðal Viðreisnar. „Ég vil ítreka að ég er alls ekki að fela sig á bak við nefndina. Mér fannst bara rétt að nefna það af því að mér fannst ég greina á fyrri orðum háttvirts þingmanns að hún þekkti hugsanlega ekki til þess að þessi beiðni hefði komið frá nefndinni þar sem hennar fulltrúi situr,“ sagði Katrín.
Samkeppnismál
KS kaupir Kjarnafæði – Skagfirska efnahagssvæðið orðið Norðurland allt
Atvinnurekendur vara við frumvarpi Þórdísar: „Draumaland þeirra sem kjósa að brjóta samkeppnislög“
Framkvæmdastjóri Örnu segir MS eiga greiðan aðgang að opinberum aðilum
Athugasemdir