Katrín Jakobsdóttir forsætisráðherra hefur skipað „framtíðarnefnd“ sem ætlað er að fjalla um tækifæri og ógnanir Íslands í framtíðinni. Mun hún fjalla meðal annars um langtímabreytingar á náttúrunni, lýðfræðilega þróun og þau hröðu umskipti sem eru í vændum með síaukinni sjálfvirkni og tæknibreytingum.
Eingöngu þingmenn sitja í nefndinni, sem mun skila árlegum skýrslum til Alþingis. Unnur Brá Konráðsdóttir, varaþingmaður Sjálfstæðisflokksins og aðstoðarmaður Katrínar, starfar með nefndinni.
Nefndinni er falið að skoða áskoranir og tækifæri vegna tæknibreytinga, áhrif tækniframfara og hina svokölluðu fjórðu iðnbyltingu. Nefndin skal stuðla að upplýstri umræðu um tækifæri og ógnanir framtíðarinnar og verði virkur umræðuvettvangur um framtíðarfræði.
Nefndarmenn eru Smári McCarthy, formaður, Líneik Anna Sævarsdóttir, varaformaður, Andrés Ingi Jónsson, Lilja Rafney Magnúsdóttir, Bryndís Haraldsdóttir, Njáll Trausti Friðbertsson, Halla Signý Kristjánsdóttir, Gunnar Bragi Sveinsson, Þorsteinn Víglundsson, Logi Einarsson og Inga Sæland.
Ráðin til að endurskoða stjórnarskrána
Unnur Brá Konráðsdóttir, fyrrverandi þingmaður Sjálfstæðisflokks og núverandi verkefnisstjóri hjá forsætisráðuneytinu, er fulltrúi ráðuneytisins og starfsmaður nefndarinnar.
Unnur var ráðin sem aðstoðarmaður forsætisráðherra frá 1. apríl til að gegna hlutverki verkefnisstjóra við endurskoðun stjórnarskrárinnar.
Tilkynnt var um ráðninguna í byrjun febrúar og haft eftir Katrínu Jakobsdóttur að það væri „mikill akkur í því að fá reynslumikinn lögfræðing með bakgrunn úr stjórnmálum, sem þar að auki nýtur trausts þvert á flokka og í samfélaginu, til að stýra þessu vandasama verkefni næstu árin“.
Athugasemdir