Enginn þingmaður eða ráðherra Sjálfstæðisflokksins hefur sett sig í samband við brotaþola Roberts Downey vegna framgöngu flokksins í sumar.

Dómsmálaráðuneytið og þingmenn Sjálfstæðisflokksins í tveimur fastanefndum Alþingis tóku harða afstöðu gegn því að upplýsingar um Robert Downey, meðmælendur hans og annarra sem fengið hafa uppreist æru litu dagsins ljós.

Úrskurðarnefnd um upplýsingamál komst svo að þeirri niðurstöðu að ráðuneytið hefði gengið lengra í upplýsingaleynd en heimilt er samkvæmt ákvæðum upplýsingalaga. 

Lögfræðingar sem Stundin hefur rætt við segja að sér hafi komið mjög á óvart hve langt stjórnvöld gengu í að halda upplýsingunum leyndum, enda hefði ráðuneytinu verið í lófa lagið að afhenda gögnin með viðkvæmum persónuupplýsingum afmáðum. 

Mynd: Af vef Málflutningsstofu Reykjavíkur

„Strax þegar ég heyrði þetta og las umfjöllun frá föður einnar stúlkunnar fannst mér þetta mjög órökrétt afstaða hjá ráðuneytinu. Ég átti bágt með að sjá í fljótu bragði hvaða lögmætu sjónarmið gætu mögulega réttlætt þessa synjun,“ segir Páll Rúnar M. Kristjánsson hæstaréttarlögmaður í samtali við Stundina. „Að sama skapi kom úrskurður úrskurðarnefndar um upplýsingamál mér alls ekki á óvart. Úrskurðurinn er rökréttur og afdráttarlaus og þar er í engu fallist á helstu sjónarmið ráðuneytisins.“ 

Haft var eftir Glódísi Töru, einni þeirra kvenna sem Robert Downey braut gegn, á Vísi.is um helgina að enginn Sjálfstæðismaður hefði haft samband við þær, brotaþolana, þrátt fyrir ítrekað yfirlýsingar Sjálfstæðismanna um samúð flokksmanna gagnvart þeim. 

Nína Rún Bergsdóttir staðfestir þetta í samtali við Stundina. Flokksmenn hafi hvorki beðið þær afsökunar né sett sig í samband við þær til að útskýra afstöðu sína.

„Enginn úr Sjálfstæðisflokknum hefur haft samband við okkur stelpurnar,“ segir hún en tekur fram að Sigríður Á. Andersen dómsmálaráðherra hafi haft samband við föður sinn, Berg Þór Ingólfsson, í ágúst til að segja honum frá hugmyndum sínum um að afnema ákvæði um uppreist æru úr lögum.

Hildur Sverrisdóttir, þingkona Sjálfstæðisflokksins og einn þeirra nefndarmanna sem gengu út af fundi stjórnskipunar- og eftirlitsnefndar þegar fjallað var um mál Roberts Downey í ágúst, hélt því fram á Facebook í síðustu viku að Sjálfstæðismenn hefðu strax í sumar kallað brotaþola og aðstandendur þeirra á sinn fund vegna upplýsinga um mál manna sem fengið hafa uppreist æru.

Bergur Þór Ingólfsson svaraði Hildi og skrifaði: „Enginn brotaþola Roberts Downey kannast við að hafa talað við þig.“ Í kjölfarið sagðist hún ekki hafa verið að vísa til brotaþola Downeys heldur til annarra þolenda kynferðisofbeldis.

Bjarni Benediktsson forsætisráðherra hefur ítrekað haldið því fram undanfarna daga að hugur flokksmanna hafi ávallt verið hjá brotaþolum og þeim sem eiga um sárt að binda.

Eins og bent hefur verið á hunsuðu þó Bjarni og dómsmálaráðuneytið fyrirspurnir þolenda og aðstandenda þeirra um veitingu uppreistar æru til kynferðisbrotamannsins Roberts Downey mánuðum saman.