Maðurinn sem var dæmdur fyrir að nauðga stjúpdóttur sinni nær daglega í 12 ár heitir Hjalti Sigurjón Hauksson og er 57 ára gamall. Hjalti fékk uppreist æru þann 16. september, sama dag og barnaníðingurinn Robert Downey.
Andrea Eyland, vinkona brotaþola til tæpra 20 ára, ávarpar stjórnvöld, forseta Íslands og brotamanninn í færslu sem hún birtir á Facebook-síðu sinni í dag.
„Hjalti Hauksson. Kvalirnar sem þú hefur valdið fólki sem ég elska eru ólýsanlegar og ófyrirgefanlegar,“ skrifar hún.
„Ég hef beðið eftir tækifæri í 15 ár til að láta í mér heyra, til að vara almenning við þér. Stjórnvöld, forseti, þið eruð i mínum augum litlu skárri.“
Stundin ræddi við Andreu í dag, en Andrea hefur þekkt brotaþolann frá því um það leyti sem hún fór að heiman.
„Ég veit eiginlega ekki hvað skal segja, annað en það sem ég gerði á Facebook,“ segir Andrea í samtali við og Stundina og bætir við: „Með því að sæma Hjalta Sigurjón Hauksson því sem stjórnvöld kalla „óflekkað mannorð“ er gert lítið úr öllu því sem þolandinn hefur gengið í gegnum, þeim vítiskvölum sem hún hefur liðið nánast alla ævi, frá fimm ára aldri og gerir enn. Að hann sé nafngreindur er eina vopnið sem almenningur hefur gegn honum og mönnum eins og honum. Við sem samfélag hljótum að krefjast þess að reglum um veitingu uppreist æru verði breytt.“
Hjalti Hauksson var dæmdur í fimm og hálfs árs fangelsi árið 2004 auk þess sem honum var gert að greiða brotaþola eina og hálfa milljón í miskabætur. Um er að ræða þyngsta dóm sem fallið hafði vegna kynferðisbrota gegn barni á þessum tíma, en Hæstiréttur taldi manninn hafa misnotað freklega vald sitt yfir stúlkunni sem stjúpfaðir, brotið ítrekað og gróflega gegn henni og valdið henni djúpstæðum skaða. Hann fékk uppreist æru þann 16. september síðastliðinn, sama dag og Robert Downey, sem var dæmdur fyrir að brjóta kynferðislega gegn fimm stúlkum, meðal annars meðan hann var um sextugt en stúlkurnar á unglingsaldri.
Bergur Þór Ingólfsson, faðir stúlku sem Robert Downey braut gegn, sagði í dag að fulltrúar ríkisstjórnarinnar í stjórnskipunar- og eftirlitsnefnd hefðu neitað að sinna skyldum sínum og þannig snúið baki við þolendum kynferðisofbeldis. Vísaði hann til þess að stjórnarliðar gengu út af fundi nefndarinnar þann 14. ágúst þegar upplýsingar um Robert Downey og veitingu uppreist æru hans voru til meðferðar. „Formaður nefndarinnar segir í sífellu að verri brot hafi verið framin. Forsætisráðherra finnst að ekki skuli gert upp á milli einstakra brota þegar veitt er uppreist æru. Forsetinn skrifar upp á óflekkað mannorð barnaníðinga í kippum því stjórnarskráin skipar honum að gera það,“ skrifaði Bergur í dag. „Upplýsingum er haldið frá brotaþolum og öllum almenningi. Það er löngu komið nóg. Fáum allar upplýsingar á borðið og nýja stjórnarskrá í kjölfarið til að vernda venjulegt fólk gegn þessu óskiljanlega rugli.“
Kynferðisbrot
Ómenning að líta á kynferðisbrot sem „fórnarkostnað við skemmtun“
Myndir af neyðarmóttöku sendar áfram: „Ekki myndir sem ég vildi sjá af sjálfri mér“
Hrapa í stöðu skrímslisins
Menn sem eru sakaðir um ofbeldi krafðir svara
„Endaði með því að ég þurfti að hugga hann“
Athugasemdir