Ari Edwald, oddviti Miðflokksins í Reykjavík, hefur farið frumlegar leiðir í kosningabaráttunni fyrir sveitarstjórnarkosningar, sem í sífellt meiri mæli færist á samfélagsmiðla.

„Skincare“Ari talar til yngri kvenkyns kjósenda og áhorfenda á TikTok með því að gera „húðrútínu“.

Mynd: TikTok / Ari Edwald

Í myndbandi sem hann birti í gær kynnir hann „Metta haul“, eða sýnir föt sem hann keypti hjá Metta sport, sem eru vinsæl hjá yngsta fólkinu.

Þá gerir hann húðrútínu, birtir myndir af sér í bol frá MettaSport bol og fer svo upp í rúm með Hello Kitty bangsa.

Ari hefur safnað tæplega 1.500 fylgjendum á TikTok frá því hann hóf útsendingar í lok mars.

Ari blandar gamni og alvöru í myndböndum sínum á TikTok. Í einu þeirra varar Ari við því að fólk sé orðið hrætt við að fara í Mjóddina og í Spöngina. Hann setur það í samhengi við fjölgun innflytjenda. Þá leggur Ari til að „auka öryggisgæslu á völdum svæðum í borginni“, til dæmis „með því að semja við lögregluna um að auka gæslu á kostnað borgarinnar“.

Þá varð Ara það á að brjóta umferðarlögin þegar hann keyrði eftir göngugötu og gagnrýndi skort á bílastæðum.

Þá drekkur Ari collab með loðhúfu í einu myndbandinu.

Í öðru myndbandi birtast Ari og Sigmundur Davíð Gunnlaugsson, formaður Miðflokksins, með TikTok-trend sem snýst um að úrskurða hvað er „millionaire“, hvað „billionaire“ og hvað „not millionaire“.

Í nýju myndbandi svarar Ari gagnrýni Sönnu Magdalenu Mörtudóttur í kappræðum, þar sem hún sagði flokkinn gera innflytjendur „tortryggilega“, þar sem hann sýnir hvernig hann blandar saman skemmtiefni sem höfða á til ungs fólks og alvarlegum stjórnmálum.

Kosið verður til borgarstjórnar, og sveitarstjórna, á morgun.