Metfjöldi, eða 129 blaða- og fjölmiðlamenn, létu lífið um allan heim árið 2025, sagði Nefnd til verndar blaðamönnum (CPJ) í dag. Ísrael bar ábyrgð á um tveimur þriðju dauðsfallanna.
Þetta var annað árið í röð sem met var slegið í fjölda látinna blaðamanna og mannskæðasta árið síðan CPJ hóf gagnaöflun fyrir meira en þremur áratugum.
„Blaðamenn eru drepnir í metfjölda á tímum þegar aðgangur að upplýsingum er mikilvægari en nokkru sinni fyrr,“ sagði Jodie Ginsberg, framkvæmdastjóri nefndarinnar, í yfirlýsingu.
„Við erum öll í hættu þegar blaðamenn eru drepnir fyrir að flytja fréttir.“
Meira en þrír fjórðu allra dauðsfalla árið 2025 urðu á átakasvæðum, sagði CPJ í skýrslu sinni.
Meira en 60 prósent af þeim 86 fjölmiðlamönnum sem féllu fyrir skotum Ísraelsmanna árið 2025 voru Palestínumenn sem störfuðu á Gaza, bætti nefndin við.
Ísraelsher heldur því fram að hann beini aldrei vísvitandi spjótum sínum að blaðamönnum.
Heimildin fjallaði ítarlega um dráp á blaðamönnum á Gaza í umfjöllun síðasta haust, þar sem nöfn og myndir þeirra föllnu voru birtar.
Fjöldi blaðamanna sem létu lífið í Úkraínu og Súdan jókst einnig árið 2025 miðað við árið áður.
CPJ benti á aukna notkun dróna, en 39 tilfelli voru skráð, þar af 28 morð af völdum Ísraels á Gaza og fimm af völdum RSF-sveitanna í Súdan.
Í Úkraínu létu fjórir blaðamenn lífið af völdum rússneskra herdróna, sem er mesti fjöldi látinna blaðamanna í stríðinu á einu ári síðan 15 létu lífið árið 2022.
Blaðamenn eru í sífellt meiri hættu vegna viðvarandi refsileysis, sagði CPJ, og benti á skort á gagnsæjum rannsóknum á morðum.
Í Mexíkó voru sex blaðamenn drepnir árið 2025 og öll málin eru enn óleyst. Á Filippseyjum voru þrír blaðamenn skotnir til bana.
Aðrir voru drepnir í kjölfar fréttaflutnings um spillingu, eins og bangladesskur fréttamaður sem var höggvinn til bana af grunuðum aðilum sem tengdust svikahring, samkvæmt skýrslu CPJ.
Svipuð dauðsföll tengd skipulagðri glæpastarfsemi voru skráð á Indlandi og í Perú.
Í Sádi-Arabíu var þekktur dálkahöfundur, Turki al-Jasser, tekinn af lífi af ríkinu eftir að hafa verið sakfelldur fyrir nokkur brot sem CPJ líkti við „falskar ásakanir um brot gegn þjóðaröryggi og fjármálaglæpi“ sem notaðar eru til að refsa fréttamönnum.
Þetta var fyrsta skrásetta morðið á blaðamanni í Sádi-Arabíu síðan Jamal Khashoggi lést árið 2018.
Árásir á Gaza
„Nú er kominn tími til að vopnahléið verði varanlegt“
Samúð dugar ekki til andspænis grimmdinni
Ísraelskur ráðherra kynnir áætlun um „brottflutning“ íbúa Gasa
Heitir meiri landtöku: „Þetta er okkar land“
„Hefurðu glatað glórunni?“
Athugasemdir (3)