Saksóknarar í Suður-Kóreu kröfðust þess í dag að Yoon Suk Yeol, fyrrverandi forseti, yrði dæmdur til dauða fyrir að lýsa yfir herlögum í desember 2024, sem steyptu landinu í glundroða.
Yoon olli pólitískri kreppu þegar hann tilkynnti endalok borgaralegrar stjórnar í desember 2024 og sendi hermenn á þingið til að framfylgja því.
Tilraun hans mistókst hins vegar og hann varð fyrsti sitjandi forseti landsins til að vera tekinn í gæsluvarðhald þegar hann var handtekinn í janúar síðastliðnum.
Réttarhöldum yfir Yoon fyrir uppreisn, valdníðslu og önnur brot tengd yfirlýsingunni lauk í dag eftir 11 klukkustunda aðalmeðferð.
Í lokaorðum sínum sökuðu saksóknarar hann um að vera höfuðpaur „uppreisnar“ sem knúin var áfram af „valdafíkn sem miðaði að einræði og langtíma valdatíð“.
Þeir sökuðu Yoon um að sýna „enga iðrun“ fyrir aðgerðir sem ógnuðu „stjórnskipun og lýðræði“.
„Stærstu fórnarlömb uppreisnarinnar í þessu máli er fólkið í landinu,“ sögðu þeir.
„Engar málsbætur eru til staðar sem taka skal tillit til við ákvörðun refsingar, heldur verður að beita harðri refsingu.“
Verjendateymi Yoons hefur á meðan beitt leikrænum rökum í tilraun til að hjálpa honum og meintum vitorðsmönnum hans.
Í dag líktu þeir forsetanum saman við sögulegar persónur eins og ítölsku fræðimennina Galileo Galilei og Giordano Bruno, sem voru ranglega dæmdir.
„Meirihlutinn afhjúpar ekki alltaf sannleikann,“ sögðu þeir.
Saksóknarar kröfðust þess einnig að Kim Yong-hyun, fyrrverandi varnarmálaráðherra, yrði dæmdur í lífstíðarfangelsi.
Búist var við að málsmeðferðinni lyki síðastliðinn föstudag, en henni var frestað eftir 15 klukkustunda umræður – það tók átta klukkustundir aðeins að fara yfir sönnunargögn fyrir Kim.
Lögmaður Kims fullyrti að „stutt tunga“ hefði komið í veg fyrir að hann gæti lesið hraðar.
Í núverandi réttarhöldum eru átta sakborningar sem taldir eru höfuðpaurar tilraunarinnar til að koma á herlögum, þar á meðal Yoon og Kim.
Verði hann fundinn sekur verður Yoon þriðji suður-kóreski forsetinn sem dæmdur er fyrir uppreisn, ásamt tveimur herforingjum í tengslum við valdarán árið 1979.
Jafnvel þótt hann verði sakfelldur og dæmdur til dauða er afar ólíklegt að dómnum verði framfylgt þar sem Suður-Kórea hefur viðhaldið óopinberu afnámi aftaka síðan 1997.
Saksóknarar krefjast einnig 10 ára fangelsisdóms yfir Yoon fyrir að hindra framgang réttvísinnar og er búist við að dómstóll í Seúl kveði upp dóm í því máli næstkomandi föstudag.
Hann á líka yfir höfði sér réttarhöld vegna ákæru um landráð vegna ásakana um að hann hafi fyrirskipað drónaflug yfir Norður-Kóreu til að styrkja tilraun sína til að lýsa yfir herlögum.
Athugasemdir (1)