Líkamsleifar fanga Ísraela bera merki um pyndingar og aftökur, segja læknar

Lík­ams­leifar 90 palest­ínskra fanga sem ísra­elsk yfir­völd skil­uðu til Gaza sam­kvæmt nýgerðu vopna­hléssam­komu­lagi, báru merki um pynt­ingar og aftökur. Þar á meðal virð­ast fang­arnir hafa verið með bundið fyrir augu, með bundnar hendur og skotsár á höfði, að sögn lækna sem breska blaðið Guardian vitnar til.

Sem hluti af vopna­hléi sem Banda­ríkin áttu milli­göngu um hafa Hamas-sam­tökin skilað líkum gísla sem lét­ust í stríð­inu, og Ísrael afhent lík­ams­leifar tveggja hópa, hvorum um sig 45 Palest­ínu­manna, sem féllu í átök­unum. Skiptin fóru fram í gegnum Alþjóða Rauða kross­inn (ICRC).

Læknar á Nasser-sjúkra­hús­inu í Khan Younis í suð­ur­hluta Gaza, sem tók á móti lík­unum frá Rauða kross­inum, sögð­ust í gær hafa séð veru­leg ummerki um bar­smíðar og aftökur og að ekk­ert lík­amanna væri auð­kenn­an­legt. „Næstum öll voru með bundið fyrir augu og bundnar hendur og þau voru með skotsár á milli augn­anna. Næstum öll höfðu verið tekin af lífi,“ sagði Dr. Ahmed al-Farra, yfir­læknir barna­deildar Nasser-sjúkra­húss­ins.

„Það voru líka ör og aflitun á húð sem sýndi að þau höfðu verið barin áður en þau voru drepin. Það voru líka merki um að líkum þeirra hefði verið mis­þyrmt eftir dauð­ann.“

Farra bætti við að ísra­elsk yfir­völd hefðu afhent líkin án auð­kenn­ingar og að sjúkra­hús í Gaza, sem hefðu orðið fyrir miklum loft­árásum á tveimur ára stríðs­tíma­bili, hefðu ekki tök á að gera DNA-rann­sóknir.

„Þeir þekkja auð­kenni þess­ara lík­ama en þeir vilja að fjöl­skyld­urnar þjá­ist enn meira út af þessum fórn­ar­lömbum,“ sagði lækn­ir­inn.

Stjórn­endur Nasser-spít­al­ans sögðu lík sem hefðu verið geymd í kælikistum í Ísrael hafa verið afhent með núm­eramiðum en án nafna. Læknar sögðu að biðlað hefði verið til nán­ustu aðstand­enda palest­ínskra karl­manna sem saknað væri að aðstoða við auð­kenn­ingu.

Alþjóð­legi saka­mála­dóm­stóll­inn (ICC) rann­sakar stríðs­glæpa­á­sak­anir á hendur báðum aðilum í tveggja ára stríð­inu í Gaza, þar á meðal dráp Ísra­els­hers á 15 palest­ínskum sjúkra­flutn­inga- og björg­un­ar­sveit­ar­mönnum sem fund­ust í grunnri gröf í mars, eftir að mynd­band hafði sýnt atburða­rás­ina.

Að sögn yfir­stjórnar sjúkra­húss­ins sem kom að því máli voru fórn­ar­lömbin kefluð á höndum og fótum og höfðu verið skotin í höfuð.

Afhend­ing lík­ams­leifa af hálfu beggja aðila hafa reynst stór hindrun í inn­leið­ingu vopna­hlés­ins sem tók gildi um helg­ina. Ísrael til­kynnti að hægja yrði á afhend­ingu mann­úð­ar­að­stoðar inn í Gaza vegna tafa á afhend­ingu 28 líka ísra­el­skra gísla sem taldir eru hafa lát­ist í stríð­inu. Þá full­yrtu ísra­elsk stjórn­völd að eitt lík­anna sem hefði verið afhent væri ekki úr hópi fyrr­ver­andi gísla.

Á mið­viku­dags­kvöld til­kynnti Hamas að hóp­ur­inn hefði skilað öllum jarð­neskum leifum lát­inna gísla sem hann hefði aðgang að, og ísra­elski her­inn stað­festi að Rauði kross­inn hefði mót­tekið tvö lík til við­bótar í Gaza.