Greta Thunberg segir að hún og palestínskur aðgerðahópur hyggist sigla nýjum flota hlöðnum hjálpargögnum til Gaza til að rjúfa „ólöglega umsátur Ísraels“.
Tvær aðrar tilraunir aðgerðasinna til að afhenda aðstoð með skipi til Gaza, í júní og júlí, voru stöðvaðar af Ísrael. Hermenn fóru um borð í skip þeirra og handtóku aðgerðasinnana áður en þeim var vísað úr landi.
„Þann 31. ágúst munum við hefja stærstu tilraun sem gerð hefur verið til að rjúfa ólöglega umsátur Ísraels um Gaza með tugum báta sem sigla frá Spáni,“ skrifaði baráttukonan sænska á Instagram í gær.
„Við munum hitta tugi til viðbótar þann 4. september sem sigla frá Túnis og öðrum höfnum,“ sagði hún.
Hópurinn mun virkja aðgerðasinna frá 44 löndum fyrir framtakið sem kallað er „Global Sumud Flotilla“. Samtímis hjálparaðstoðinni eru boðaðar mótmælaaðgerðir.
Mannúðarsinnar, læknar og listamenn - þar á meðal leikararnir Susan Sarandon frá Bandaríkjunum, Gustaf Skarsgård frá Svíþjóð og Liam Cunningham frá Írlandi - munu taka þátt, samkvæmt yfirlýsingum hópsins.
Ekki er tilgreindur nákvæmur fjöldi skipa sem sigla til Gaza í þetta skipti.
„Global Sumud Flotilla“ lýsir sér á vefsíðu sinni sem „sjálfstæðum“ samtökum sem eru ekki tengd neinum stjórnvöldum eða stjórnmálaflokki.
Árás Ísraels sem staðið hefur yfir í 22 mánuði hefur kostað að minnsta kosti 61.430 Palestínumenn lífið, samkvæmt heilbrigðisráðuneyti Gaza. Sameinuðu þjóðirnar segja tölurnar áreiðanlegar.
Árás Hamas á Ísrael árið 2023, sem kveikti stríðið, leiddi til dauða 1.219 manns, samkvæmt talningu AFP byggðri á opinberum tölum.
Árásir á Gaza
„Nú er kominn tími til að vopnahléið verði varanlegt“
Samúð dugar ekki til andspænis grimmdinni
Ísraelskur ráðherra kynnir áætlun um „brottflutning“ íbúa Gasa
Heitir meiri landtöku: „Þetta er okkar land“
„Hefurðu glatað glórunni?“
Athugasemdir