Greinilegt að almenningi ofbýður

„Marga hryllir svo við þessu og fólk sem hefur kannski ekki tekið mikla afstöðu til þess áður tjáir sig við okkur. Það er greini­legt að almenn­ingi ofbýður, sér­stak­lega eftir að Ísland sat hjá í þess­ari atkvæða­greiðslu og þær skýr­ingar sem fólk gefur ekki mikið fyrir,“ segir Hjálmtýr Heiðdal, for­maður félags­ins Íslands-Palest­ínu.  

Vika er síðan fasta­nefnd Íslands hjá Sam­ein­uðu þjóð­unum sat hjá við afgreiðslu alls­herj­ar­þings­ins á ályktun þess efnis að koma á mann­úð­ar­vopna­hléi á Gaza taf­ar­laust. Tillagan var lögð fram af Jórdönum. Kanada lagði fram breyt­ing­ar­til­lögu um að árás Hamas-sam­tak­anna á ísra­elska borg­ara yrði for­dæmd sam­tímis. Á hana féllst meiri­hluti aðild­ar­ríkja Sam­ein­uðu þjóð­anna ekki. Utan­rík­is­ráðu­neytið seg­ist hafa stutt til­lögu Kanada og þar sem ekki hafi náðst sam­staða um hana hafi Ísland setið hjá.

Loft­árásir Ísra­els­hers halda áfram og í vik­unni voru gerðar tvær loft­árásir á flótta­manna­búðir á Gaza. Börn eru stór hluti þeirra sem hafa látið lífið í átök­unum. „Fórn­ar­kostn­aður stig­mögn­unar átaka á Gaza er mældur í lífum barna,“ sagði Catherine Russel, fram­kvæmda­stjóri Unicef, á fundi örygg­is­ráðs Sam­ein­uðu þjóð­anna á þriðju­dag. Nefnd um rétt­indi barna á vegum Sam­ein­uðu þjóð­anna tekur í sama streng. „Það er eng­inn sig­ur­veg­ari í stríði þar sem þús­undir barna eru drepin,“ segir í yfir­lýs­ingu nefnd­ar­innar. 

Ísland-Palest­ína hefur staðið fyrir þremur úti­fundum og tveimur mót­mæla­stöðum við ráð­herra­bú­stað­inn til að krefj­ast við­bragða frá stjórn­völdum. Hjálmtýr segir kröf­una skýra: „Stuðn­ingur við taf­ar­laust vopna­hlé af mann­úð­ar­á­stæðum. Þetta er stórt neyð­ar­á­stand. Það deyr barn á tíu mín­útna fresti. Mörg eru grafin undir rúst­unum og það er eng­inn bún­aður, það er engin alþjóð­leg hjálp­ar­sveit komin á stað­inn, Ísraelar hindra það. Fólkið er með berum höndum og ein­hverjum skóflum að reyna að róta í rúst­unum og leita að ætt­ingjum. Þetta er hroða­legt ástand. Stríðs­glæpir í beinni útsend­ingu á hverri ein­ustu mín­útu. Og þetta versnar.“    

Kyrrð­ar­stundHátt í 2.000 manns tóku þátt í kertafleyt­ingu til minn­ingar um börn sem hafa lát­ist í átök­unum á Gaza.

Mynd: Aðsend

Félagið stóð einnig fyrir kertafleyt­ingu við Tjörnina á sunnu­dag þar sem hátt í 2.000 manns fleyttu kertum til minn­ingar um börn sem hafa lát­ist í átök­unum. Nöfn barn­anna, yfir 3.000 tals­ins, voru lesin upp. „Þetta var kyrrð­ar­stund. Maður er búinn að sjá svo mikið af hrika­legum myndum af látnum börnum og særðum börnum sem er verið að hlaupa með inn í spít­ala sem eru undir hálfum afköstum. Það var mjög margt fólk þarna sem lýsti því hrein­lega að það klökkn­aði við þessa til­hugsun,“ segir Hjálmtýr. 

Á sunnu­dag klukkan 14 mun Ísland-Palest­ína halda stór­fund fyrir Palest­ínu í Háskóla­bíói undir yfir­skrift­inni: Vopnahlé strax! Auk Hjálmtýs munu Anna Lúð­víks­dóttir, fram­kvæmda­stjóri Amnesty á Íslandi, Kolbrún Birna Bachmann, lög­fræð­ingur og bar­áttu­kona, Viðar Þor­steins­son heim­spek­ingur og Yousef Ingi Tamimi hjúkr­un­ar­fræð­ingur flytja ávörp. Ljóða­lestur og tón­list­ar­at­riði munu einnig setja svip sinn á fund­inn. „Við væntum þess að fylla bíóið. Reiði almenn­ings er vax­andi,“ segir Hjálmtýr.