Fyrri aukaspurning:

Hver er á myndinni hér að ofan? Listamannsnafnið nægir.

***

Aðalspurningar:

1.  Hvaða ár var Rauði krossinn stofnaður? Var það 1763 — 1813 — 1863 — eða 1913?

2.  Margrét Skúladóttir gegndi fyrst allra kvenna ákveðnu embætti eða tign á Íslandi, en aðeins í eitt ár og á 13. öld. Að minnsta kosti ef við lítum söguna hefðbundnum skilningi. Hver var Margrét Skúladóttir?

3.  Karl einn hét að tveim skírnarnöfnum Alphonse Gabriel og fæddist 1899. Hann gerðist glæpamaður og varð frægur sem slíkur. Hvað var ættarnafn hans?

4.  Hvaða borg tengist nafni hans helst?

5.  Hvaða frægi flotaforingi var eineygður?

6.  Frægur fótboltakappi af karlkyni á síðasta áratug síðustu aldar nefndist Romario. Fyrir hvaða landslið keppti hann?

7.  Fyrir hvaða flokk situr Hildur Sverrisdóttir á þingi?

8.  En Arndís Anna Kristínardóttir Gunnarsdóttir?

9.  Árið 1967 samdi Frakkinn Jacques Revaux lag sem var að endingu gefið út í Frakklandi, sungið af Claude François sem einnig samdi textann (með smá hjálp). Lagið kallaðist „Comme d'habitude“ sem þýðir „Eins og venjulega“ og textinn lýsir sambandi elskenda sem orðið er þreytt og lúið. Lagið naut þokkalegra vinsælda í Frakklandi en þegar Bandaríkjamaður keypti réttinn að laginu og gaf það út í Bandaríkjunum með allt öðrum texta og um allt annað efni, þá urðu vinsældir þess gríðarlegar. Undir hvaða nafni þekkjum við nú þetta franska lag sem öðlaðist þannig nýtt líf í Bandaríkjunum?

10.  Hver söng lagið í Bandaríkjunum og 1969 og gerði það heimsfrægt?

***

Síðari aukaspurning:

Hvað heitir þessi prinsessa?

***

Svör við aðalspurningum:

1.  1863

2.  Hún var drottning Noregs og þar með fyrsta drottning Íslands líka þegar eiginmaður hennar Hákon gamli náði yfirráðum á Íslandi 1262 — ef við förum að hefðbundinni söguskoðun. Hákon lést ári síðar. 

3.  Capone.

4.  Chicago.

5.  Nelson.

6.  Brasilíu.

7.  Sjálfstæðisflokkinn.

8.  Pírata.

9.  My Way.

10.  Frank Sinatra.

***

Á efri myndinni er allsherjar skemmtikrafturinn Divine.

Á neðri myndinni er allsherjar prinsessan Ariel úr Litlu hafmeyjunni.