Eftir að hafa þráfaldlega þrætt fyrir áform um innrás í Úkraínu, þrátt fyrir mikinn liðssöfnuð við landamærin, fyrirskipaði Vladimir Pútín Rússlandsforseti herdeildum að ráðast á landið úr mörgum áttum í nótt. Pútín lýsti árásunum sem sértækum aðgerðum og fyrirskipaði Úkraínumönnum að veita enga mótspyrnu, heldur leggja niður vopn. „Nató styður úkraínska nýnasista ... Aðgerðir okkar eru sjálfsvörn gegn ógnum,“ sagði Pútín í nótt.
Sprengingar heyrðust í nótt Kharkiv, Kramatorsk og Dnipro í austri, í Odessu og Kherson í suðri, og höfuðborginni Kyiv í norðri. Úkraínsk yfirvöld segja meira en 40 hermenn hafa látist og upp undir 10 óbreytta borgara.
„Hver sem reynir að trufla okkur, eða að ógna landi okkar og þjóð, verður að vita að andsvar Rússlands verður tafarlaust og leiðir yfir ykkur afleiðingar sem þið hafið aldrei upplifað í sögu ykkar. Við erum tilbúin í hvað sem er,“ sagði Pútín í ávarpi sínu í nótt.
Pútín sagði hernaðaraðgerðirnar vera „spurningu um líf og dauða“ vegna útþenslu Nató. „Þetta er rauða línan sem ég hef oft talað um. Þeir eru komnir yfir hana,“ sagði Pútín. Hann vitnaði til aðgerða Nató í Júgóslavíu 1999 og innrásar Bandaríkjanna í Írak 2003, máli sínu til stuðnings, og sagði að Bandaríkin væri „heimsveldi lyga“.
Þá réttlætti Pútín innrásina með því að hann væri að hreinsa Úkraínu af nasisma. Áður hefur hann skilgreint Úkraínu sem sköpunarverk Rússa og efast um tilvistarrétt ríkisins. Undanfarið hefur hann síðan endurtekið ásakanir um þjóðarmorð Úkraínumanna í Donbass.
Úkraínsk yfirvöld fullyrtu að þau hefði skotið niður fimm herflugvélar og eina þyrlu.
Í gærkvöldi beindi Volodymir Zelenski, forseti Úkraínu, orðum sínum til rússnesku þjóðarinnar og sagði að hún ein gæti stöðvað óréttmæta árás.
Í morgun flutti hann ávarp til úkraínsku þjóðarinnar. Þar sagði hann Rússa hafa ráðist á Úkraínu með slægum hætti og hegðað sér líkt og Adolf Hitler gerði í upphafi Seinni heimsstyrjaldar. Hann sagði Rússa vera á „vegferð illsku“.
Forseti framkvæmdastjórnar Evrópusambandsins, Ursula von der Leyen, boðaði harðar refsiaðgerðir. „Við munum frysta eignir Rússa í Evrópusambandinu og stöðva aðgengi rússneskra banka að evrópskum fjármálamörkuðum,“ sagði hún. „Við fordæmum þessa villimannslegu árás og þau illkvittnu rök sem notuð eru til að réttlæta hana.“
Þá sagði hún: „Við munum ekki leyfa Pútín forseta að innleiða valdbeitingu og ósvífni í stað alþjóðalaga.“
Úkraínustríðið
Pútín fundar um endalok Úkraínustríðsins
Forstjóri CIA í leyniför til Rússlands
Friðarsinni dæmdur fyrir að „grafa undan“ hernaði
Segja Rússa stunda „drónaveiðar“ á fólki
Segir Pútín að stöðva stríðið
Athugasemdir