Inga Dóra Sigurðardóttir, stærðfræðikennari við Verslunarskóla Íslands sem býr í Árbænum í Reykjavík, er skattadrottning Íslands árið 2020 vegna tæplega tveggja milljarða króna tekna sem tengjast covid-19 faraldrinum. Hún er jafnframt sá Íslendingur sem hafði hæstar tekjur á síðasta ári miðað við álagningarskrár ríkisskattsjóra. Tekjurnar, sem skráðar eru á Ingu Dóru, eru hins vegar ekki aðeins vegna hennar eignar, heldur vegna eiginmanns hennar, Barkar Arnviðarsonar, eins stofnenda fyrirtækisins ChemoMetec.

Háar fjármagnstekjur Ingu Dóru stafa af arðgreiðslum sem skýrast af sölu á eignarhlut í danska fyrirtækinu ChemoMetec, sem meðal annars selur bæði mælitæki og greiningarlausnir sem hafa verið nýtt í baráttunni gegn Covid-19. Þannig voru framleiðsluvörur fyrirtækisins meðal annars notaðar við þróun á bóluefni AstraZeneca, auk annars. Virði hlutabréfa í fyrirtækinu tæplega þrefaldaðist milli seinni hluta árs 2019 og seinni hluta árs 2020.

Heildarárstekjurnar sem eru skráðar á Ingu Dóru námu rétt tæpum tveimur milljörðum króna árið 2020, eða 1.995 milljónum króna. 

Af þessu greiddi Inga Dóra 440 milljónir króna í skatta, langmest í formi fjármagnstekjuskatts enda fjármagnstekjur uppistaðan í tekjum Ingu Dóru á síðasta ári. Alls hafði Inga Dóra 1.984 milljónir króna í fjármagnstekjur á árinu og greiddi af þeim 436 milljónir í fjármagnstekjuskatt. Launatekjur Ingu Dóru á mánuði námu um 925 þúsund krónum á síðasta ári.

Í nýju tölublaði Stundarinnar er hátekjulistinn birtur, þar sem birtar eru tekjur 3.125 tekjuhæstu Íslendinganna á síðasta ári, tekjuhæsta 1 prósentsins. 

Tekjur fjölskyldunnar tæpir 2,5 milljarðar króna

Auk Ingu Dóru högnuðust synir hennar tveir hvor um sig um hátt í 250 milljónir króna með sölu á hlutabréfum í ChemoMetec á síðasta ári. Eiginmaður Ingu Dóru, sem er einn stofnenda ChemoMetec, er hins vegar ekki skráður fyrir tekjunum í álagningarskrá Skattsins. Ástæðan er að samkvæmt skattareglum eru fjármagnstekjur hjóna skráðar á þann maka sem hefur hærri launatekjur. Launatekjur Barkar hér á landi eru mun lægri en launatekjur Ingu Dóru.

Þegar Stundin hafði samband við Ingu Dóru var hún upptekin í garðvinnu. „Ég er að slá hérna garðinn,“ sagði Inga Dóra, og spurð út í hvernig henni þætti að vera skattadrottning Íslands svaraði hún: „Ég hef ekkert meira um þetta að segja, þetta er mitt einkamál.“