Töluverðar götulokanir og umferðarraskanir verða í miðborg Reykjavíkur í dag vegna hátíðahalda. Raskanirnar standa yfir frá klukkan 7 til 18, en mismunandi götur verða lokaðar á ólíkum tímum dags.
Í tengslum við morgunathöfn á Austurvelli verða Skólabrú, Kirkjustræti, Pósthússtræti, Templarasund og Vonarstræti lokaðar frá klukkan 7. Lokanirnar standa til klukkan 12, en umferð um Skólabrú, Kirkjustræti og Pósthússtræti verður áfram lokuð til klukkan 13.
Þá verða takmarkanir á umferð um Suðurgötu, Túngötu og Aðalstræti á milli klukkan 11.45 og 12.30.
Vegna skrúðgöngu, sem fer frá Hallgrímskirkju og þaðan í Hljómskálagarð, verða frekari lokanir í miðborginni á milli klukkan 12 og 14. Lokað verður við Eiríksgötu og Barónsstíg, Eiríksgötu og Njarðargötu, Frakkastíg og Bergþórugötu, Skólavörðustíg og Bergstaðarstræti og við Bankastræti.
Takmarkanir verða einnig á umferð um götur sem þvera Skólavörðustíg og Bankastræti. Það á við um Kárastíg, Bjarnarstíg, Baldursgötu, Týsgötu, Ingólfsstræti, Þingholtsstræti og Skólastræti.
Á sama tíma verður Lækjargötu lokað frá Hverfisgötu. Einnig verður lokað um Fríkirkjuveg, Sóleyjargötu og Skothúsveg vestan Fríkirkjuvegs. Skálholtsstígur verður lokaður fyrir neðan Laufásveg, Bragagata fyrir neðan Fjólugötu og Fjólugata norðan við Bragagötu.
Laugavegur verður þó opinn að Frakkastíg.
Í tengslum við fjölskyldudagskrá í Hljómskálagarði verða Fríkirkjuvegur frá Vonarstræti, Sóleyjargata og Skothúsvegur vestan Fríkirkjuvegs lokuð frá klukkan 14 til 18. Þá verða Skálholtsstígur, Bragagata og Fjólugata áfram lokuð með sama hætti og fyrr um daginn.
Breytingar verða einnig á einhverjum leiðum Strætó vegna hátíðahaldanna og er farþegum bent á að kynna sér nánari upplýsingar hjá Strætó áður en lagt er af stað.
Athugasemdir