Saksóknari í Lúxemborg vinnur nú að gerð ákæru í hinu svokallaða Lindsor-máli. Henri Eippers, talsmaður dómsmálaráðuneytisins þar í landi, segir í svarið við fyrirspurn Kjarnans að ekki sé hægt að segja til um hversu langan tíma það verk muni taka þar sem saksóknarinn í málinu sé einnig að vinna að öðrum verkefnum samhliða.
Fyrir næstum tveimur árum síðan greindi Kjarninn frá því að rannsóknardómari í Lúxemborg hefði lokið rannsókn sinni á á Lindsor-málinu og sent niðurstöður hennar til saksóknara, tæpum tólf árum eftir að hinn íslenski banki Kaupþing, sem er miðpunktur málsins, féll og atburðirnir sem málið snýst um áttu sér stað. Það gerði hann með formlegri ákvörðun sem dagsett var 24. júlí 2020.
Síðan þá hefur málið legið hjá saksóknaranum sem hefur nú í næstum 20 mánuði verið að leggja mat á niðurstöðuna til að komast að niðurstöðu um hvort senda eigi ákæru til dómstóla í Lúxemborg.
Kjarninn greindi frá því sumarið 2020, og hafði eftir Dian Klein, talskonu dómsmálaráðuneytis Lúxemborgar, að aðstoðarsaksóknari sem ynni að málinu teldi afar líklegt að ákæra verði lögð fram gagnvart einhverjum þeirra grunuðu í málinu.
Lán veitt sama dag og neyðarlánið
Lindsor-málið snýst um 171 milljónir evra lán sem Kaupþing veitti félagi sem heitir Lindsor Holding Corporation og er skráð til heimilis á Tortóla-eyju. Lánið var veitt 6. október 2008, sama dag og neyðarlög voru sett á Íslandi og Geir H. Haarde, þáverandi forsætisráðherra, bað guð að blessa Ísland. Þann dag lánaði Seðlabanki Íslands líka Kaupþingi 500 milljónir evra í neyðarlán.
[adspot]Lánið til Lindsor var aldrei borið undir lánanefnd Kaupþings. Það var notað til að kaupa skuldabréf af Kaupþingi í Lúxemborg, einstökum starfsmönnum þess banka og félagi í eigu vildarviðskiptavinar Kaupþings.
Þegar Kaupþing féll þremur dögum eftir kaupin á bréfunum var ljóst að Lindsor gat ekki greitt lánið til baka, enda eina eign félagsins verðlitlu skuldabréfin sem félagið hafði keypt á yfirverði þremur dögum áður. Engar tryggingar voru veittar fyrir láninu og tap kröfuhafa Kaupþings vegna þess því umtalsvert. Þeir sem seldu bréfin losuðu sig hins vegar undan ábyrgðum og, ef grunsemdir rannsakenda eru réttar, tryggðu sér um leið mikinn ágóða.
Fjórir einstaklingar gætu verið ákærðir
Lindsor-málið er stærsta hrunmálið sem hefur ekki enn verið klárað með ákæru þrátt fyrir að hafa verið til rannsóknar í á tólfta ár, bæði hjá lögregluyfirvöldum á Íslandi og í Lúxemborg. Þeir sem eru grunaðir um lögbrot í málinu, fyrrverandi helstu stjórnendur Kaupþings og vildarviðskiptavinur þeirra, hafa ávallt harðneitað að nokkuð saknæmt hafi átt sér stað.
Rannsókn málsins er enn opin hjá yfirvöldum í báðum löndunum þótt engar ákærður hafi verið gefnar út í því.
Í fréttatilkynningu sem var send út frá saksóknarembættinu í Lúxemborg í ágúst í 2020 sagði að á meðan að rannsóknin stóð yfir hafi fimm einstaklingar haft stöðu grunaðra.
[links]Fjórir af þeim verða ákærðir, samkvæmt niðurstöðu rannsóknarinnar, ef ákæra verður gefin út. Ekki er greint frá því um hvaða fjóra einstaklinga er að ræða.
Dómskerfið í Lúxemborg er ólíkt því sem Íslendingar eiga að venjast. Ákæra saksóknara er send til svokallaðs „council chamber“ héraðsdómsstigs Lúxemborgar sem mun taka ákvörðun um hvort að málið fái efnismeðferð eða verði vísað frá. Sakborningar í málinu munu á þeim tímapunkti fá tækifæri til að setja fram varnir í málinu.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Hrunið
Segir Margréti leikstjóra ekkert vita um málið: „Þetta er bara sóðaskapur“
Lárus bankastjóri líkir dómsmálum úr bankahruninu við Covid-faraldurinn
Fyrrverandi þingmaður Samfylkingar biðst afsökunar á sínum hlut í Landsdómsmálinu
Bók um íslenska hrunið fær glimrandi umsögn í Financial Times
Stendur við orð sín um að Seðlabankinn hafi verið misnotaður
Athugasemdir