Fréttir velferðarmál

Segist ekki vera kunningi Braga

Í yfirlýsingu frá föður mannsins sem sakaður er um brot gegn dætrum sínum í umfjöllun Stundarinnar segist hann einungis einu sinni hafa hitt Braga og að það hafi ekki haft áhrif á ákvarðanatöku barnaverndaryfirvalda.

Bára Huld Beck

28. apríl 2018 · 17:36

Birtist upphaflega á Kjarnanum fyrir 9 árum.

Faðir mannsins sem sakaður er um brot gegn dætrum sínum, í umfjöllun Stundarinnar í gær, segist ekki vera „kunningi“ Braga Guðbrandssonar, fyrrverandi forstjóri Barnaverndarstofu og frambjóðandi Íslands til Barnaréttarnefndar Sameinuðu þjóðanna, og að hann hafi að honum vitandi aldrei gengið erinda hans.

[links]Þetta kemur fram í yfirlýsingu sem lögfræðingur hans sendi á fjölmiðla í dag.

Hann segir jafnframt að af faglegum ástæðum hafi hann haft samskipti við Braga á árum áður, þegar hann starfaði við barnavernd, en það séu sennilega yfir þrjátíu ár síðan hann hafði slík samskipti við Braga. „Ég hef hitt Braga einu sinni á ævinni, einhvern tíman á árunum 1981-1986, þegar ég var formaður barnaverndarnefndar og hann starfaði hjá Kópavogsbæ. Það er allur kunningsskapur okkar,“ segir hann í yfirlýsingunni.

[adspot]

Í umfjöllun Stundarinnar er hvergi notað orðið „kunningi“ og er orðalagið sem notað er í greininni á þann veg að faðir mannsins og Bragi hafi verið málkunnugir frá því þeir störfuðu báðir við barnaverndarmál.

Í yfirlýsingu Pírata, sem flokkurinn sendi frá sér í gær, kemur þetta tiltekna orðalag fram, þar sem dregin er sú ályktun að þeir hafi verið kunningjar.

Hér fyrir neðan má lesa yfirlýsingu föður mannsins í heild sinni.

[box]

Yfirlýsing „kunningja“ Braga Guðbrandssonar

Fjölmiðilinn Stundin og þingflokkur Pírata hafa slegið því upp að ég sé kunningi Braga Guðbrandssonar forstjóra Barnaverndarstofu og að hann hafi vegna þess kunningsskapar haft einhvern óeðlileg afskipti af barnaverndarnefnd Hafnarfjarðar og meðferð þess á máli um umgengni sonardætra minna.

Hið rétta er hins vegar að barnaverndaryfirvöld hafa aldrei tálmað eða takmarkað umgengni sonar míns við dætur sínar, hvorki á grundvelli meints gruns um kynferðisbrot eða af öðrum ástæðum. Það var þannig aldrei möguleiki að neinn maður, kunningi minn eða ekki, gæti haft áhrif á ákvarðanatöku þeirra um slíka hluti, þar sem barnaverndarnefnd Hafnarfjarðar hefur ekki að mér vitandi haft til meðferðar mál þar sem tekin var ákvörðun um umgengni sonar míns við dætur sínar.

Vegna ásakanna sem stafa frá barnsmóður sonar míns og fjölskyldu hennar hefur barnaverndarnefnd óskað eftir rannsókn lögreglu og Barnahúss. Slík rannsókn fór fram og bendir ekkert til að sonur minn hafi brotið gegn dætrum sínum eða nokkrum öðrum. Ef talið væru einhverjar líkur á því að börnum stæði hætta af honum hafa barnaverndaryfirvöld allar valdheimildir til að takmarka umgengni hans við dætur sínar eða láta það fara fram undir eftirliti. Það hafa þau ekki gert, enda ítarlegar rannsóknir aldrei gefið tilefni til þess.

Ég leitaði til Barnaverndarstofu með formlega kvörtun um starfshætti barnaverndarnefndar Hafnarfjarðar, þar sem barnsmóðir sonar míns hélt því fram að hún gæti ekki staðið við umgengnissamkomulag vegna þess að barnaverndarnefnd heimilaði ekki umgengni. Hvorki, sonur minn, lögmaður hans né ég gátu fengið svör frá barnaverndarnefnd um hvaðan þessi fullyrðing væri komin og hvort í gangi væri eitthvað mál sem gæti staðið í vegi fyrir umgengni.

Þetta gerði ég þar sem eiginkona mín var þá dauðvona og þráði það að geta hitt barnabörn sín síðustu jólin sem hún lifði. Ég hafði samband við alla yfirmenn sem mér hugkvæmdust hjá stofnunum barnaverndaryfirvalda og reyndi að fá svör. Þá óskaði ég eftir því að þeir beittu sér til að hafa milligöngu við barnsmóður sonar míns og fá hana með einhverjum hætti til að leyfa ömmu barnanna að kveðja þær.

Ég er ekki ‚kunningi‘ Braga Guðbrandssonar og hann hefur að mér vitandi aldrei gengið minna erinda. Af faglegum ástæðum hef ég haft samskipti við hann á árum áður, þegar ég starfaði við barnavernd, en það eru sennilega yfir þrjátíu ár síðan ég hafði slík samskipti við hann. Ég hef hitt Braga einu sinni á ævinni, einhvern tíman á árunum 1981-1986, þegar ég var formaður barnaverndarnefndar og hann starfaði hjá Kópavogsbæ. Það er allur kunningsskapur okkar.

Ég bið vinsamlegast fjölmiðla, þingmenn og almenning að leyfa ekki heift og óbilgirni að særa fleiri. Hættið að nota saklaus börn sem skotfæri í ljótum leik stjórnmála- og embættismanna. Hversu mikilvægt sem þið teljið það að koma höggi á andstæðing, munið að það er raunverulegt fólk á bak við trúnaðargögnin sem þið fenguð einhvern til að leka. Og að sá sem lekur trúnaðargögnum velur hverju er lekið úr samhengi og hvaða ósannindum er hvíslað með.

Höfundur er prestur og fyrrum formaður barnaverndarnefndar.

Kjósa

Hvernig finnst þér þessi grein? Skráðu þig inn til að kjósa.

Veistu meira? Láttu okkur vita

Deila

Höfundur

Bára Huld Beck

Fréttamál

velferðarmál

Efnisorð

Athugasemdir

Skráðu þig inn til að skrifa athugasemd eða kjósa.

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.

Tengdar greinar