Guðni Th. Jóhannesson, forseti Íslands, sendi í dag stuttar og hnitmiðaðar heillaóskir á Donald Trump, nýkjörinn forseta Bandaríkjanna.
Í heillaóskunum bendir Guðni sérstaklega á þau atriði sem Donald Trump hefur verið helst gagnrýndur fyrir í kosningabaráttunni, þar á meðal jafnrétti kynjanna og jafnan rétt óháð trú.
Trump hefur margsinnis verið staðinn að kvenfyrirlitningu, bæði fyrir kosningabaráttunna og í henni. Hann hefur meðal annars kallað fréttamann „gálu“ og ítrekað vísað til útlitslegra einkenna kvenna í andsvari við gagnrýni þeirra. Hann segist vera andvígur fóstureyðingum, nema í tilfellum eins og nauðgunum. Þá hefur hann sagst vilja útiloka múslima frá því að koma til Bandaríkjanna, en dregið nokkuð í land með það. Á sama tíma hefur hann biðlað til óbreyttra borgara að fylgjast með múslimum. Múslimar hafa verið óttaslegnir yfir sigri Trump. Loks hefur Trump reglulega beint spjótum sínum að fjölmiðlum í ræðum sínum og nefnt þá „lygafjölmiðla“.
Guðni Th. Jóhannesson, forseti Íslands, beinir heillaóskum sínum sérstaklega að gildum sem Trump hefur brotið gegn. „Enda þótt Bandaríkin væru eitt stærsta lýðræðisríki veraldar en Ísland eitt hið minnsta deildu þjóðirnar mörgum mikilvægum gildum; við styðjum einhuga frelsi til hugsana og tjáningar, jafnrétti kynjanna og höfum í hávegum jafnan rétt allra þegna óháð litarhafti eða trú.“
„... höfum í hávegum jafnan rétt allra þegna óháð litarhafti eða trú.“
Stundin hafði samband við embætti forseta Íslands í morgun og neitaði Örnólfur Thorsson forsetaritari að gefa upp hvort sendar yrðu heillaóskir, en þær voru síðan sendar síðla dags í dag.
Annar tónn í heillaóskum til Obama
Heillaóskir Guðna til Donalds Trump eru töluvert frábrugðnar þeim heillaóskum sem forseti Íslands færði Barack Obama við kjör hans árið 2008.
Þar var megináherslan á endurnýjanlega orkugjafa, frið, stuðning við fátæka og heilbrigðismál, en Donald Trump hefur á stefnuskránni að stórauka olíu- og gasframleiðslu með rýmri reglum, aukinn vígbúnað, skattalækkanir á fyrirtæki og afnám Obamacare, sem er kerfi sem veitir fátækum heilbrigðisþjónustu: „Vandamálin sem nú blasa við veröldinni – þörfin á að skapa frið og öryggi, baráttan gegn loftslagsbreytingum, endurbætur á fjármálakerfi heimsins og umbætur í þágu hinna fátækari og til að veita öllum rétt til heilbrigðisþjónustu og menntunar – kalla á afgerandi forystu.
Forseti Íslands rifjaði í bréfinu upp samræður þeirra Obama þar sem reynsla og kunnátta Íslendinga í nýtingu hreinnar orku hafi verið á dagskrá, hvernig Íslendingar gætu orðið að liði við að umskapa orkubúskap Bandaríkjanna, hverfa frá olíu og kolum til hreinna orkugjafa og koma þannig í veg fyrir hinar hrikalegu loftslagsbreytingar. Íslendingar væru nú sem áður reiðubúnir til slíkrar samvinnu við Bandaríkin.“
Heillaóskir Guðna til Trump
„Forseti Íslands Guðni Th. Jóhannesson hefur í dag, miðvikudaginn 9. nóvember, sent Donald Trump, nýkjörnum forseta Bandaríkjanna, heillaóskir frá sér og íslensku þjóðinni í kjölfar sigurs hans í forsetakosningunum.
Forseti áréttaði í kveðju sinni rótgróna samvinnu og vináttu þjóðanna tveggja og langa sameiginlega sögu sem teygði anga sína allt aftur til þess er sæfarendur frá Íslandi og Grænlandi tóku land í Norður- Ameríku fyrir meira en þúsund árum. Öldum síðar hefðu þúsundir Íslendinga flutt búferlum vestur um haf og leitað nýrra tækifæra sem nýbúar í frjálsum samfélögum.
Enda þótt Bandaríkin væru eitt stærsta lýðræðisríki veraldar en Ísland eitt hið minnsta deildu þjóðirnar mörgum mikilvægum gildum; við styðjum einhuga frelsi til hugsana og tjáningar, jafnrétti kynjanna og höfum í hávegum jafnan rétt allra þegna óháð litarhafti eða trú.“
Heillaóskir Ólafs Ragnars Grímssonar til Obama
5. nóvember 2008
„Forseti Íslands Ólafur Ragnar Grímsson sendi í dag nýkjörnum forseta Bandaríkjanna Barack Obama og fjölskyldu hans heillaóskir frá sér og íslensku þjóðinni.
Í bréfinu sagði forseti Íslands að kosning Obama væri sögulegur vitnisburður um að í krafti lýðræðis gætu hugsjónir og framsýni, vonir og barátta almennings orðið áhrifaríkt breytingaafl.
Vandamálin sem nú blasa við veröldinni – þörfin á að skapa frið og öryggi, baráttan gegn loftslagsbreytingum, endurbætur á fjármálakerfi heimsins og umbætur í þágu hinna fátækari og til að veita öllum rétt til heilbrigðisþjónustu og menntunar – kalla á afgerandi forystu.
Forseti Íslands rifjaði í bréfinu upp samræður þeirra Obama þar sem reynsla og kunnátta Íslendinga í nýtingu hreinnar orku hafi verið á dagskrá, hvernig Íslendingar gætu orðið að liði við að umskapa orkubúskap Bandaríkjanna, hverfa frá olíu og kolum til hreinna orkugjafa og koma þannig í veg fyrir hinar hrikalegu loftslagsbreytingar.
Íslendingar væru nú sem áður reiðubúnir til slíkrar samvinnu við Bandaríkin.
Vinátta Íslands og Bandaríkjanna ætti sér djúpar rætur í lýðræðislegum arfi landanna, vitneskju um að eitt elsta lýðræðisríki heims og hið öflugasta gætu komið góðum málum til leiðar. Við værum einnig reiðubúin til að deila nýfenginni reynslu okkar í glímunni við fjármálakreppuna með öðrum og taka þannig þátt í því að ríkjum veraldar takist að skapa nýja umgjörð, öruggari stjórn og tryggara eftirlit, breyta stofnunum sem kenndar eru við Bretton Woods á þann veg að þær fullnægi betur þörfum 21. aldar.
Forsetinn vék í lok bréfsins að samstarfi sínu við forystumenn í Bandaríkjunum á undanförnum árum og óskaðir nýkjörnum forseta og þingi allra heilla í vandasömum verkum.“
Forsetakosningar 2016
Jón Trausti Reynisson
Nýfasisminn teygir sig til Íslands
Karl Th. Birgisson
Saga af tveimur forsetum: Helgi fokking Björns. Og hnykkurinn
Jón Trausti Reynisson
Innreið Íslands í nútímann
Hver er Guðni Th?
Hverju breytir Guðni á Bessastöðum?
Athugasemdir