Alda Hrönn Jóhannesdóttir aðstoðarlögreglustjóri kvartaði til menntamálaráðuneytisins og innanríkisráðuneytisins vegna einkatölvupósts frá Ara Matthíassyni þjóðleikhússtjóra til Jóns H. B. Snorrasonar aðstoðarlögreglustjóra. Samkvæmt forsíðufrétt DV í gær fór tölvupósturinn fyrir mistök á fleiri aðila, en Alda Hrönn taldi hann ærumeiðandi og niðrandi gagnvart sér.

Ari kaus að tjá sig ekki um málið þegar Stundin leitaði eftir viðbrögðum frá honum. Í frétt DV ítrekaði Ari hins vegar að um væri að ræða einkapóst á milli tveggja vina þar sem þetta hafi verið sett upp sem gamanmál. „Ég hélt að það væri stjórnarskrárbundinn réttur hvers og eins að einkasamskipti væri lögvernduð,“ var haft eftir Ara í frétt DV.

Þar var greint frá því að ónafngreindur aðili hefði kvartað undan bréfinu og að málið væri til skoðunar hjá menntamálaráðuneytinu. Fram kom að ritstjóri DV hefði kynnt sér innihald póstsins og greint frá því að Ari hefði notað orð á borð við „kvendi“, „þessara kvenna“ og „stelpurnar“. Ljóst væri að með stelpunum ætti hann við þær Öldu Hrönn og Sigríði Björk Guðjónsdóttur, lögreglustjóra.

Eggert Skúlason, ritstjóri blaðsins, skrifaði fréttina, en skömmu eftir útgáfu blaðsins birtist leiðrétting á vefnum þar sem fram kom að Ari hefði aldrei notað orði „kvendið“ í tölvupóstinum. Þar sagði einnig að Ari hefði sagt að lekar af málum lögreglunnar kæmi frá þeim konum sem væru æðstu stjórnendur í lögreglunni.

Tvíburasystir Öldu Hrannar er Bára Hildur Jóhannsdóttir, maki Arnars Ægissonar, sem er framkvæmdastjóri Pressunnar og stór hluthafi í DV.

„Gamaldags karlremba“

Í kjölfar fréttarinnar birtist svo pistill í slúður- og skoðanadálkinum Orðið á götunni á vef Pressunar þar sem Ari var sagður „gamaldags karlremba“.

„Ari hefur á undanförnum árum gefið sig út fyrir að vera nútímalegur femínisti, baráttumaður fyrir jöfnum hlut kynjanna, talað skýrt í þá veru á opinberum vettvangi. Nú er komið í ljós að Ari er líka gamaldags karlremba þegar hann er í einrúmi og sendir vini sínum tölvupóst. Þá eru æðstu yfirmenn lögreglunnar í Reykjavík orðnar „stelpurnar“ og fast skotið á Harald Johannessen ríkislögreglustjóra fyrir að vilja „uppræta spillingu“ með þeim,“ segir í pistlinum.

Ekki náðist í Öldu Hrönn við vinnslu fréttar.

Flæktist í lekamálið

Alda Hrönn er nánasti samstarfsmaður Sigríðar Bjarkar Guðjónsdóttur lögreglustjóra á höfuðborgarsvæðinu. Alda Hrönn og Sigríður Björk störfuðu saman um árabil hjá Lögreglunni á Suðurnesjum. Eftir að Sigríður Björk var skipuð lögreglustjóri af þáverandi innanríkisráðherra Hönnu Birnu Kristjánsdóttur, var Alda Hrönn sett aðstoðarlögreglustjóri í stað Harðar Jóhannessonar.

Hörður hafði verið einn nánasti samstarfsmaður Stefáns Eiríkssonar fyrrum lögreglustjóra. Stundin fjallaði ítarlega um þær hrókeringar sem áttu sér stað innan lögreglunnar fyrir ári síðan og má lesa nánar um það hér.  

Vakti athygli að Sigríður Björk var skipuð án auglýsingar af Hönnu Birnu, en hún braut lög þegar hún, þá lögreglustjóri á Suðurnesjum, sendi Gísla Frey Valdórssyni persónuupplýsingar um hælisleitandann Tony Omos. Gísli Freyr var á þeim tíma aðstoðarmaður Hönnu Birnu innanríkisráðherra. Hann var dæmdur fyrir að leka persónuupplýsingum, sem byggðu meðal annars á rannsóknargögnum frá Suðurnesjum, í fjölmiðla.

Sigríður Björk og Hanna Birna störfuðu saman innan Sjálfstæðisflokksins.

Grimmt valdatafl

Líkt og hefur komið fram í fjölmiðlum er mikil ólga innan lögreglunnar, þar sem tekist er á um starfshætti Sigríðar Bjarkar. Samkvæmt RÚV hafa fjórtán lögreglumenn kvartað til Landssambands lögreglumanna yfir Sigríði Björk. Auk þess hafa Ólöfu Nordal innanríkisráðherra borist kvartanir frá lögreglumönnum. Þeirra á meðal var Aldís Hilmarsdóttir, yfirmaður fíkniefnadeildar lögreglu höfuðborgarsvæðisins, sem fór á fund Ólafar til að ræða samskipti sín við Sigríði Björk.

Þegar Aldís óskaði eftir fundinum sættu tveir lögreglufulltrúar fíkniefnadeildarinnar rannsókn Ríkissaksóknara annars vegar og Héraðssaksóknara hins vegar, vegna meintra brota í starfi. Þá greindi RÚV frá því að lengi hefði verið stirt á milli Aldísar og Sigríðar Bjarkar lögreglustjóra. Þá staðhæfði Fréttatíminn að lögreglustjórinn hefði viljað flytja Aldísi úr fíkniefnadeildinni en Jón H. B. Snorrason, aðstoðarlögreglustjóri, og Friðrik Smári Björgvinsson, yfirlögregluþjónn, hefðu verið því mótfallnir. Áður hafði Aldís afþakkað flutning til héraðssaksóknara í desember.

Örfáum dögum eftir að fréttir voru sagðar af fundi Aldísar og ráðherrans var hún færð tímabundið til í starfi. Samkvæmt RÚV var sú ákvörðun alfarið tekin af Sigríði Björk og án samráðs við Aldísi, sem leitaði til lögfræðings vegna málsins. Sigríður Björk sagðist hins vegar hafa metið það sem svo að það væri gott að fá utanaðkomandi aðila til að stýra fíkniefnadeildinni um tíma.