Kristján Ingi Helgason, fyrrverandi aðstoðaryfirlögregluþjónn á Suðurnesjum, segir að framkoma og eineltistilburðir Sigríðar Bjarkar Guðjónsdóttur lögreglustjóra gagnvart sér og öðrum sé efni í heila bók.
Þetta kemur fram í stöðuuppfærslu sem hann birti á Facebook í dag en Kristján starfaði undir Sigríði á Suðurnesjum meðan hún var lögreglustjóri þar. Kristján segist hafa fylgst með fréttaflutningi af málum lögreglunnar á höfuðborgarsvæðinu og að hann geti ekki orða bundist lengur.
„Ég var aðstoðaryfirlögregluþjónn á Suðurnesjum þegar þessi kona tók við sem lögreglustjóri og ég varð fyrir miklu einelti af hennar hálfu. Ég hef margar stórar sannanir fyrir hennar gjörðum, en hef beðið með að segja frá þeim,“ skrifar hann og bætir við: „Nú þegar allar þær fréttir sem borist hafa af gjörðum þessarar konu á höfuðborgarsvæðinu hafa komið fram hef ég ákveðið að segja mína sögu og þá um leið koma væntanlega aðrar sannar sögur um þessa konu fram. Hugsanlega á að segja söguna um þennan lögreglustjóra í bókaformi og ef einhver góður rithöfundur sem þetta les hefur áhuga á að skrifa um þetta, þá hafið samband við mig.“
Ítrekað skipuð án auglýsingar
Kristján segir Sigríði eiga sér skrítna sögu þar sem hún hafi ítrekað verið skipuð í stöður án auglýsinga „eða þá eins og á Suðurnesjum þegar þáverandi lögreglustjóra var komið frá með bolabrögðum þáverandi dómsmálaráðherra“.
Vísar Kristján þarna til atburða sem áttu sér stað árin 2007 og 2008. Björn Bjarnason, sem þá var dómsmálaráðherra, setti Sigríði í embætti aðstoðarríkislögreglustjóra við embætti ríkislögreglustjóra til fimm ára frá 1. janúar 2007. Skipunin vakti athygli ekki síst vegna þess að embættið var aldrei auglýst laust til umsóknar.
Ári síðar skipaði svo Björn Sigríði sem lögreglustjóra á Suðurnesjum í kjölfar umdeildrar ákvörðunar um að auglýsa stöðu Jóhanns R. Benediktssonar, þáverandi lögreglustjóra, lausa til umsóknar án nokkurs tilefnis. Jóhann hafði þótt farsæll í starfi og notið stuðnings á meðal starfsmanna embættisins. Víkurfréttir minntist á einelti í þessu samhengi og þrír lykilstarfsmenn sögðu upp störfum vegna málsins.
Loks var Sigríður Björk flutt frá Suðurnesjum til Reykjavíkur og skipuð lögreglustjóri án auglýsingar árið 2014 eftir að Stefán Eiríksson, fyrrverandi lögreglustjóri, sagði starfi sínu lausu vegna ítrekaðra afskipta þáverandi innanríkisráðherra af lögreglurannsókn á ráðuneyti hennar.
Í ljósi alls þessa telur Kristján ljóst að lögreglustjórinn njóti verndar verndar Sjálfstæðisflokksins. „Þessi kona, (lögreglustjóri) virðist vera undir verndarvæng ákveðins stjórnmálaflokks og virðist þar af leiðandi vera vernduð fyrir öllum þeim kærum sem á hana eru bornar,“ skrifar hann.
Stuðningur frá þingmönnum og ráðherra
Unnur Brá Konráðsdóttir, þingkona Sjálfstæðisflokksins og formaður allsherjarnefndar Alþingis, kom fram í kvöldfréttum RÚV í byrjun ágúst og lýsti yfir eindregnum stuðningi við lögreglustjórann. Þá var Ólöf Nordal innanríkisráðherra nýlega spurð að því hvort eitthvað gæti orðið til þess að staða Sigríðar Bjarkar sem lögreglustjóra yrði tekin til skoðunar. Hún svaraði því neitandi.
Stundin ræddi við Kristján Inga í kvöld og mun fjalla áfram um málefni lögreglunnar á næstu dögum. Kristján er þriðji aðilinn sem sakað hefur Sigríði Björk um einelti í sumar. Stundin greindi frá því þann 23. júlí síðastliðinn að Aldís Hilmarsdóttir, fyrrverandi yfirmaður fíkniefnadeildar, hefði stefnt íslenska ríkinu vegna framgöngu lögreglustjóra gagnvart sér. Í stefnu Aldísar er Sigríður sögð hafa brotið gegn starfsmannalögum, jafnréttislögum, stjórnsýslulögum, ýmsum meginreglum stjórnsýsluréttar og reglugerð um aðgerðir gegn einelti og ofbeldi á vinnustöðum. Henni er gefið að sök að hafa með ámælisverðum og endurteknum hætti valdið Aldísi vanlíðan og lagt hana í einelti. „Þannig hafi lögreglustjóri t.a.m. dregið að skipa stefnanda í starf sem aðstoðaryfirlögregluþjónn, reynt að koma henni úr starfi með því að leggja til flutning til héraðssaksóknara, gengið um deild stefnanda og lesið upphátt úr tölvupóstum hennar til sín fyrir undirmenn og aðra starfsmenn stefnanda, svo fátt eitt sé nefnt,“ segir í stefnunni.
Í síðustu viku greindi svo Stundin frá því að annar fyrrverandi starfsmaður fíkniefnadeildar hefði kvartað undan einelti Sigríðar Bjarkar. Í bréfi lögmanns mannsins til starfsmannaskrifstofu lögreglunnar og innanríkisráðuneytisins er því lýst hvernig Sigríður Björk öskraði á manninn, hótaði honum stöðulækkun, svipti hann lögreglufulltrúastöðu og dró til baka ákvörðun um að hann fengi að sækja sérhæfingarnámskeið erlendis. Þá er fullyrt að að vegið hafi verið að starfsheiðri lögreglumannsins og fjárhagslegri afkomu hans auk þess sem málið hafi haft djúpstæð áhrif á fjölskylduna. Bæði hann og fleiri fjölskyldumeðlimir hafi þurft að leita sér sálfræðiaðstoðar vegna framgöngu Sigríðar Bjarkar en lögregluembættið greiddi kostnaðinn af þeirri meðferð.
Lögregla og valdstjórn
Lögreglan mælir aukna ógn á hryðjuverkum í nýju áhættumati
Lögreglan segir að gildandi lög hafi heft rannsókn á meintum ISIS-liða
Enn vanti sjálfstætt eftirlit með lögreglu
Helmingur yfirstjórnenda lögreglunnar fékk stöðuna án auglýsingar
Bróðir ráðherrans sem skipaði Sigríði án auglýsingar fékk stöðu án auglýsingar
Athugasemdir