Aðstoðarmaður fjármálaráðherra, Gylfi Ólafsson, segist hafa rætt við Benedikt Jóhannsson um ummæli sem Benedikt lét falla í ræðustól í gær, og að Benedikt sjái eftir þeim.
Ummælin lét Benedikt falla í umræðum um verklag við opinber fjármál, og fjallaði Stundin um það fyrr í dag. Þar sagði hann „Mér finnst áhugavert hverjir það eru sem sýna mestan áhuga á þessum umræðum. Það erum við Njáll Trausti og hinar hagsýnu húsmæður sem eru í stórum hópum hér inni. Það er þannig að það skiptir afar miklu máli að tala um þetta.“
Bjarkey Olsen Gunnarsdóttir, þingkona Vinstri grænna, gagnrýndi orðaval Benedikts harðlega í dag og í kjölfarið baðst hann afsökunar. „Í ræðustól Alþingis vísaði ég til þingkvenna sem hagsýnna húsmæðra. Það var tilraun til þess að gefa hnyttið andsvar við fyrri ræðu, en hún heppnaðist afleitlega. Um leið og ég heyrði mig segja þetta hugsaði ég: „Þú ert nú ekki alltaf jafn orðheppinn Benedikt.“ Þetta voru kjánaleg ummæli og ég biðst afsökunar á þeim,“ skrifaði hann.
„Tilraunir Benedikts til að vera fyndinn eru mistækar.“
Gylfi Ólafsson, aðstoðarmaður Benedikts, tjáði sig um málið á Facebook í dag. Þar sagðist hann hafa rætt við fjármálaráðherra og að hann sæi eftir ummælunum, og hefði gert það strax í ræðustól. „Tilraunir Benedikts til að vera fyndinn eru mistækar. Ég ræddi þetta við hann og hann sér eftir þessu; og sá eftir þessu strax í ræðustól.“
Gylfi tjáði sig um málið á síðu Ingu Auðbjargar Straumland, en hún er eiginkona Helga Hrafns Gunnarssonar, fyrrum þingmanns Pírata. Í færslunni biðlaði Inga til Gylfa, sem femínista, að kenna Benedikt að vera ekki karlrema. „Það er alveg hægt ef hann bara vandar sig. Hann getur til dæmis byrjað á því að passa sig á því hvernig hann hrósar konum og hætta að vísa í úreltar staðalímyndir og furða sig á fjármálalæsi kvenna.“
Katrín eins og Lea prinsessa
Inga bendir í sömu færslu á að þetta sé ekki í fyrsta skiptið sem Benedikt hafi gerst uppvís að karlrembu. „Sami ráðherra var sælla minninga uppvís að því að hrósa Kötu Jak fyrir útlit sitt í Kryddsíldinni, á meðan allir karlarnir fengu hrós um umhyggjusemi og dugnað.“ 
Þar vísar Inga í orð Benedikts sem hann lét falla í Kryddsíldinni, síðasta gamlársdag, en þau hlutu umtalsverða gagnrýni. Í þættinum voru saman komnir sjö fulltrúar stjórnmálaflokkanna á Alþingi, en aðeins einn af þeim, Katrín Jakobsdóttir, var kona. Þegar fulltrúunum var gert að hrósa hver öðrum, og var Katrín sú eina þeirra sem fékk hrós fyrir útlit. Benedikt sagði við það tilefni: „Ég var nú að hafa orð á því við Katrínu áðan að mér finnst hún vera eins og Lea prinsessa hérna, hún er svo flott hérna í dag. Það er eiginlega bara það fallegasta sem ég get sagt um þig að þessu sinni.“
Kynjamál
Strákar sem vilja farða sig
Jón Viðar biðst afsökunar: „Þetta var ósmekklegt hjá okkur“
„Ég upplifi í þessari viku eins og árið hafi einungis verið slæmur draumur“
Ritstjóri Morgunblaðsins segir „offorsið“ gegn séra Ólafi dæmi um galdrabrennu
Segir hræsni að vilja rýmka réttinn til þungunarrofs en banna nektardans
Athugasemdir