Ríkið greiddi félagsgjöldin í tengslanet atvinnulífs og stjórnmála

For­sæt­is­ráðu­neytið, Einka­leyfa­stofan og Rík­is­sátta­semj­ari hafa greitt félags­gjöld fyrir starfs­menn sem eiga aðild að Exedra, tengsla­neti kvenna úr stjórn­málum, stjórn­sýslu, atvinnu­lífi og fjöl­miðlum, í ár og í fyrra.

Samtökin eru rekin sem einka­hluta­fé­lag, Exedra ehf., sem er í eigu Sig­þrúðar Ármann lög­fræð­ings og Evu Hrundar Ein­ars­dóttur, bæj­ar­full­trúa Sjálf­stæð­is­flokks­ins á Akureyri. Fyr­ir­tækið var stofnað árið 2006 sem „vett­vangur fyrir val­inn hóp áhrifa­mik­illa kvenna“ að því er áður kom fram á vef þess. Frí­blaðið Sirkús lýsti Exedra sem „leyni­fé­lagi“ árið 2007 sem hefði verið „líkt við rótarý­klúbb og/eða Frí­múr­ara­regl­una“.

Félagið hefur haldið mán­að­ar­lega fundi um ára­bil og jafn­framt skipu­lagt skemmti­ferðir kvenna til útlanda, en ráð­herrar, banka­stjórar, fram­kvæmda­stjórar fyr­ir­tækja og for­stöðu­menn opin­berra stofn­ana hafa verið í hópi félaga. 

Fjallað er um Exedra í meist­ara­rit­gerð Val­gerðar Jóhann­es­dóttur við­skipta­fræð­ings frá 2009 og rætt við aðila að sam­tök­unum undir nafn­leynd. „Almennt í tengsla­netum þurfum við að vera óhræddar við að nota þetta sem við­skipta­tæki­færi,“ er haft eftir einum við­mæl­and­anum. „Að við ætlum að nýta okkur þetta í starfi og skömm­umst okkar ekk­ert fyrir það að leita hver til ann­arrar á við­skipta­legum for­sendum og þá þarf að hnippa í konur svo­lítið hvað það varðar.“ 

For­sæt­is­ráðu­neytið greiddi félags­gjöld að upp­hæð 63.500 krónur til Exedra í jan­úar 2018. Í ár lögðu Einka­leyfa­stofan og Rík­is­sátta­semj­ari 74.500 krónur hvort vegna félags­gjalda starfs­manna.