Mætir menn hafa nú í nokkurn tíma talað fyrir því að komið verði á fót íslenskri leyniþjónustu. Þetta hefur verið kallað Greiningardeild lögreglu sem fá á í hendur forvirkar rannsóknarheimildir. Þessir góðu menn vilja sem sagt skapa vinnustofu þar sem um 25 til 30 menn og konur stunda rannsóknir og víðtæka upplýsingaöflun um íslenska eða erlenda ríkisborgara án þess að um sé að ræða rökstuddan grun um glæpsamlegt athæfi.

Innanríkisráðherrann okkar nýi hefur kallað eftir opinni umræðu um málið og ég vil svara því kalli.

Mig langar til að byrja á að lýsa yfir eindrægum stuðningi við þessar hugmyndir.

Svona ríkisapparat er löngu tímabært og í raun lífsspursmál fyrir fullveldi og frelsi okkar litla ríkis að þessu verði komið á fót.
Hér í þessum pistli og þeim næstu fylgir listi yfir þá hópa og stofnanir sem rík þörf er á að gegnumlýsa og skanna með forvirkum rannsóknarheimildum.

Þetta hljóta semsagt að verða stóru verkefnin hjá Íslensku greiningardeildinni eða ÍGD eins og hún verður væntanleg kölluð.

Kanasleikjur

Gamla og nýja Heimdellinga og tengsl Sjálfstæðisflokksins við bandarísk stjórnvöld. Svara þarf spurningunni: Liggja enn kaldastríðsþræðir úr stjórnsýslunni í gegnum Sjálfstæðisflokkinn og til sendiráðs Bandaríkjanna eða útsendara þeirra?

Bandaríkin eru jú eitt af illu heimsveldunum sem uppi eru á vorum dögum og eru nær alltaf í stríði einhvers staðar. Stjórnvöld þar hafa viðurkennt pyntingar á stríðsföngum sínum og eru grunuð um launmorð á kjörnum fulltrúum annarra ríkja og kraftmikla undirróðursstarfsemi fyrir hagsmunum sínum um allan heim.

Smáríki eins og Ísland þarf að hafa mikinn vara á sér í samskiptum við þetta heimsveldi, sem sagan kennir okkur að svífst einskis við hagsmunagæslu hinna ráðandi stétta, og fótum treður ekki bara alþjóðalög heldur einnig sína eigin stjórnarskrá ef svo ber undir.

Hin væntanlega greiningardeild okkar þarf að uppræta alla flugumenn þessa ríkis innan íslenskrar stjórnsýslu. Grunsemdir hafa vaknað vegna þjónkunar stjórnsýslunnar í tengslum við Wikileaks ofsóknirnar sem teygðu sig hingað og fangaflugið illræmda sem millilenti hér átölulaust. Það þarf að hafa varann á sér gagnvart bandarískum stjórnvöldum og það þarf að kanna bakgrunn þeirra manna sem eru í makki við þetta lið.

Rússadindlar

Alla þá sem tala fyrir þjónkun og þjónustu við rússnesk stjórnvöld. Hér verður að setja sérstaklega undir stækkunarglerið Skagfirðinga sem fengið hafa sérstakan konsúl í hérað sitt sem er mjög grunsamlegt. Svo þarf að rannsaka forseta Íslands sem hefur sýnt Pútín mikil vinahót og ekki síst þarf að skanna fyrrverandi seðlabankastjóra sem reyndi að gera okkur að skuldaþrælum þess heimsveldis sem er eitt af hinum illu heimsveldum vorra dag.

Rússneska ríkið er ríki í stríði og hefur nýverið innlimað heilu landsvæðin á stærð við Norðurland vestra og eystra samanlagt. Stjórnvöld þar, líkt og í Bandaríkjunum, eru alræmdir mannréttindabrjótar og meintir blaðmannamorðingar. Nú hafa þeir hafið áróðursstríð og undirróður upp á Amerísku.

Landið er í raun einræðisríki í dulargervi og svífst einskis í grímulausri hagsmunagæslu sinni og ber enga virðingu fyrir alþjóðalögum.

Liðsmenn Kínverska Alþýðulýðveldisins

Greiningardeildin þarf að skanna alla starfsemi kínverska sendiráðsins og sérstaklega hina fjölmennu kínversku viðskiptaskrifstofu og alla þá Íslendinga sem eru í samkrulli við útsendara „Miðríkisins“ eins og það kallar sig.

Hér liggja margir gamlir og nýir samfylkingarmenn undir sterkum grun og sérstaklega þeir sem bundust vináttuböndum við kínverska landakaupmanninn Núbó. Þrálátan orðróm um massívar iðnaðarnjósnir þeirra hér á landi þarf að kanna í þaula.

Kínverskir ráðamenn hafa stofnanavætt skoðanakúgun gegn sínum eigin borgurum og eiga heimsmetið í dauðarefsingum. Þeir reka einhverskonar mjúka nýlendustefnu í Afríku og leggja þar undir sig auðlindir og landsvæði. Hér er komið annað tilefni til að kanna bakgrunn forsetans og tengsl hans og daður við ráðamenn „þriðja ríkisins“ á lista hinna illu heimsvelda.

Samantekið er það ljóst að allt óeðlilegt samkrull og makk við bandaríska, rússneska og kínverska ráðamenn og útsendara þeirra er ógnun við langtímahagsmuni íslensku þjóðarinnar enda hlýtur öll samreið með slíkum ferðafélögum, eins og að ofan greinir, að ganga í berhögg við þau manngildissjónarmið sem haldið er á lofti stjórnarskrár lýðveldisins.

Spurning hvort það megi ekki senda greiningardeildina á forsetann? Það þarf að finna út úr því.

Í næstu grein mun ég fjalla um fleiri aðkallandi verkefni greiningardeildar af innlendum toga.

Bæði Sturlungaöld og Baugsmálin sýna okkur hvað getur gerst þegar ríki myndast innan ríksins. Saga Ítalíu síðustu 100 árin er lýsandi dæmi um þetta. ÍGD hlýtur að þurfa að kortleggja þá aðila sem sýna tilburði þessa átt.

Virðingarfyllst.
Benedikt

Benedikt Erlingsson er margreyndur leikari og gerði garðinn frægan með Fóstbræðrum á sínum tíma. Þá hefur hann leikstýrt fjölda leikverka og var margverðlaunaður fyrir kvikmyndina Hross í oss, fékk meðal annars kvikmyndaverðlaun Norðurlandaráðs.