Þetta og svo ótal margt fleira er á döf­inni næstu tvær vik­urnar.

VIÐ SKEMMDUM ALLT

Hvar? Lista­stofan
Hvenær? 6.–19. sept­em­ber
Aðgangs­eyrir: Ókeypis!

Lista­stofan var stofnuð árið 2015 af Martynu Daniel og Emmu Sand­er­son, tveimur inn­flytj­endum, með það í huga að bjóða stöku sinnum upp á mód­el­teikn­ingar og nám­skeið. Fjórum árum síðar hafa 62 ein­stakar lista­sýn­ingar verið haldnar þar, auk ara­grúa af nám­skeiðum, fyr­ir­lestrum og fleiri við­burðum. 63. sýn­ingin verður sú síð­asta, en til stendur að loka Lista­stof­unni að henni lok­inni. Á þess­ari loka­sýn­ingu verða sýnd verk átta lista­fólks búsetts á Íslandi sem að hafa fárán­leika og húmor að leið­ar­ljósi undir þem­anu eyði­legg­ing. Haldið verður sér­stakt opn­un­ar­kvöld 6. sept­em­ber kl. 17.00, en form­legri lokun verður fagnað í Iðnó 19. sept­em­ber með geysi og glensi, lista­sýn­ingu og tón­leikum.

Draumadís

Hvar? Flæði
Hvenær? 6.–8. sept­em­ber
Aðgangs­eyrir: Frjáls fram­lög!

Ása Bríet sýndi verkið Drauma­dís sem verk í vinnslu á útskrift­ar­sýn­ingu sinni úr textíl­deild Mynd­lista­skól­ans í Reykja­vík árið 2018, en þar bjó hún til sinn eigin vefstól og óf kjól beint í sniðið sitt. Verkið tók um yfir 100 klukku­stundir að vinna. Nú, ári síðar, mun hún sýna verkið full­klárað. Sér­stakur gjörn­ingur verður fluttur með verk­inu 6. sept­em­ber kl. 18.00.

Hjaltalín

Hvar? Harpa
Hvenær? 6. & 7. sept­em­ber kl. 20.00
Aðgangs­eyrir: frá 4.990 kr.

Ljúfsveitin Hjalta­lín hefur látið lítið fyrir sér fara síð­ustu miss­eri, en á þessu ári hefur hún unnið hörðum höndum að fjórðu hljóð­vers­plötu sinni. Er þetta fyrsta platan í fullri lengd sem hljóm­sveitin gefur út í sjö ár, og má því segja að hún sé að vakna úr dvala. Stór­tón­leikar verða haldnir í Eld­borg­ar­sal til að fagna þessum áfanga.

Flaaryr – útgáfutónleikar

Hvar? Flæði
Hvenær? 7. sept­em­ber kl. 15.00
Aðgangs­eyrir: Frjáls fram­lög!

Argent­ínska tón­skáldið og gít­ar­ist­inn Flaaryr fagnar útgáfu stutt­skíf­unnar Vegvísir, en lista­mað­ur­inn hefur verið búsettur í Reykja­vík frá mars síð­ast­liðnum. Sköp­un­ar­ferli plöt­unnar hófst í Argent­ínu en var lokið hér á Íslandi, og kemst því platan ekki hjá því að ávarpa flutn­ing­inn frá Buenos Aires til Reykja­víkur. Með honum spila Guð­mundur Arnalds, MSEA, Flaaryr og Sideproject.

Biometric Exit

Hvar? Midpunkt
Hvenær? til 29. sept­em­ber
Aðgangs­eyrir: Ókeypis!

Þessi sýn­ing Jake Laffoley og Lionell Guzman, sem eru búsettir í Montréal og New York, er ádeila á eft­ir­lits­sam­fé­lagið og gagna­söfnun stjórn­valda og einka­fyr­ir­tækja á almenn­ingi. Í sýn­ing­unni Biometric Exit fylgj­ast eft­ir­lits­mynda­vélar með gestum og reyna að greina and­lit og hegðun þeirra, en gestum býðst not af felu­bún­ingum og öðrum græjum til að blekkja vél­arnar.

Haustlaukar

Hvar? Lista­safn Reykja­víkur
Hvenær? 7.–29. sept­em­ber
Aðgangs­eyrir: Ókeypis!

Í sept­em­ber efnir Lista­safn Reykja­víkur til sam­sýn­ingar utan veggja safn­hús­anna. Fimm mynd­list­ar­menn setja fram ný verk sem birt­ast á fjöl­breyttan og nýstár­legan hátt víða um Reykja­vík og í því sam­eig­in­lega rými sem tækni sam­tím­ans býður upp á. Um er að ræða gjörn­inga, inn­grip og upp­á­komur af ýmsu tagi.

Ljósanótt 2019

Hvar? Reykja­nes­bær
Hvenær? Til 8. sept­em­ber
Aðgangs­eyrir: Fer eftir við­burði

Ljósa­nótt er árleg menn­ingar- og fjöl­skyldu­há­tíð Reykja­nes­bæjar, en hún er haldin í 20. sinn í ár. Hátíðin er alltaf fyrstu helg­ina í sept­em­ber á ári hverju, en á hátíð­inni er áhersla lögð á viða­miklar upp­á­komur. Aðal­at­riðið er ávallt stór­tón­leik­arnir á laug­ar­dags­kvöld­inu, en í ár koma meðal ann­ars fram Emmsjé Gauti & Aron Can, Salka Sól og fleiri. Hátíðin er plast­laus í ár.

Minningartónleikar Lofts Gunnarssonar

Hvar? Hard Rock Café
Hvenær? 11. sept­em­ber kl. 20.00
Aðgangs­eyrir: 3.990 kr.

Loftur Gunn­ars­son féll frá 32 ára gam­all vegna maga­sárs sem hefði verið hægt að lækna, en hann fékk ekki þá aðstoð sem hann þurfti þar sem hann var utan­garðs­maður. Hann hefði orðið 40 ára 11. sept­em­ber og því halda aðstand­endur hans minn­ing­ar­tón­leika honum til heið­urs þar sem Pétur Ben, Ragn­heiður Gröndal, Krummi og fleiri koma fram. Allur ágóði rennur til minn­ing­ar­sjóðs Lofts sem hjálpar utan­garðs­fólki.

Independent Party People

Hvar? Tjarn­ar­bíó
Hvenær? 13. sept­em­ber kl. 20.00
Aðgangs­eyrir: 4.400 kr.

Í þessu verki kannar leik­hóp­ur­inn Sálu­fé­lagar sjálfsí­mynd Íslend­inga og hvernig hún er að hluta til sam­an­safn af þægi­legum og sölu­vænum kreddum. Tekist er á við mýtur um að þjóðin sé eins­leitur hópur af álfatrú­andi nátt­úru­unn­endum. Hópurinn not­ast við aðferðir sam­sköp­un­ar­leik­húss við svið­setn­ingu sjálfs og ímyndar. 

Extreme Chill 2019

Hvar? Mengi, Gauk­ur­inn, og víðar
Hvenær? 12.–15. sept­em­ber
Aðgangs­eyrir: 9.900 kr.

Extreme Chill er fjög­urra daga tón­list­ar­há­tíð sem nýtir svið á sex mis­mun­andi stöðum. Hátíðin er haldin í tíunda skiptið, en á henni mæt­ast ólík list­form: bæði þá sveitir kenndar við til­rauna­kennda raf­tóna, og líka lif­andi mynd­list. Fram hafa komið ýmsar kanónur úr þessum senum, en í ár stígur meðal ann­ars goð­sagna­kennda hljóm­sveitin Tan­gerine Dream á sviðið.

Emilíana Torrini

Hvar? Salurinn
Hvenær? 12. & 13. sept­em­ber kl. 20.30
Aðgangs­eyrir: frá 4.950 kr.

Emilíana Torrini og Jón Ólafsson héldu vin­sæla tón­leika­röð síð­asta vetur og hafa ákveðið að end­ur­taka leik­inn með tvennum tón­leikum. Þau munu fara í gegnum lit­ríkan feril söng­kon­unnar. Lög frá upp­hafs­árum fer­ils Emilíönu á Íslandi verða á dag­skránni rétt eins og hennar stærstu smellir á alheims­vísu.

Mugison

Mynd: Kristinn Magn­ús­son

Hvar? Háskóla­bíó
Hvenær? 13. & 14. sept­em­ber kl. 20.00
Aðgangs­eyrir: 4.990 kr.

Brenni­steins-predik­ara-söngskáldið Mugison sem er (ekki) frá Ísafirði hefur verið á hring­ferð um landið í sumar. Hann hefur spilað sam­tals 30 tón­leika þar sem hann kemur einn fram með gítar og söng­rödd sína, en hann lýkur þessu ferða­lagi í Háskóla­bíói. Búast má við góðu jafn­vægi af gömlum sem og nýrri lögum.

Vocal Line & Vocal Project

Hvar? Harpa
Hvenær? 14. sept­em­ber kl. 20.00
Aðgangs­eyrir: 4.900 kr.

Danski kór­inn Vocal Line og íslenski kór­inn Vocal Project eru um margt ólíkir en eiga þó sam­eig­in­legt að hafa vakið athygli fyrir fág­aðan söng í flóknum og fjöl­breyttum útsetn­ingum. Kórarnir ein­blína báðir á sam­tímatón­list, svo sem popp, rokk, djass og dæg­ur­lagatón­list. Þessir tveir sam­tíma­kórar leiða saman hesta sína á þessum tón­leikum.

Gilitrutt

Hvar? Þjóð­leik­húsið
Hvenær? 15.–28. sept­em­ber
Aðgangs­eyrir: 2.900 kr.

Brúðu­leik­ritið Gilitrutt segir frá bónda­kon­unni Freyju sem er löt til verka og lendir í klónum á Gilitrutt fyrir vikið, en lærir af þeim sam­skiptum að rækja skyldur sínar og taka ábyrgð á eigin gjörðum. Brúðu­meist­ar­inn Bernd Ogrodnik segir að þessi sýn­ing sé ást­ar­óður sinn til Íslands. Gilitrutt hlaut Grímu­verð­launin sem barna­sýn­ing árs­ins 2011.

Brúðkaup Fígaros

Hvar? Þjóð­leik­húsið
Hvenær? til 12. októ­ber
Aðgangs­eyrir: frá 3.000 kr.

Óperan Brúðkaup Fígarós er byggð á gam­an­leik­riti Beaumarchais og er full af fyndnum upp­á­komum, mis­skiln­ingi og óvæntum upp­ljóstr­unum. Verkið hefur engu að síður alvar­legan und­ir­tón og felur í sér leiftr­andi ádeilu á sam­skipti yfir­stéttar og alþýðu, stétta­skipt­ingu og for­rétt­indi.