Nokkrir eigendur fasteigna á Granda hafa kært starfrækslu gistiskýlis fyrir heimilislausa á svæðinu til úrskurðarnefndar umhverfis- og auðlindamála. Fréttablaðið greinir frá.
Í nóvember samþykkti borgarráð kaup á húsnæði við Grandagarð sem notað verður sem gistiskýli fyrir unga heimilislausa karlmenn í verulegum vímuefnavanda. Gistiskýlið mun rúma 15 manns og vera opið frá klukkan 17 síðdegis til 10 á morgnana.
Eigendur fasteignanna krefjast ógildingar á leyfi fyrir innréttingu gistiskýlisins þar sem það samræmist hvorki skipulagsáætlunum né lóðarleigusamningi. Borgin mótmælir því á þeim forsendum að um þjónustustarfsemi sé að ræða.
Í kærunni er fjallað um að svæðið vaxi hratt, sé nýtt undir spennandi veitinga- og verslunarstarfsemi, auk hönnunarvinnu og nýsköpunar. Verulegum áhyggjum er lýst yfir því að gistiskýli hamli frekari þróun og uppbyggingu þar og vísað er til þess að það sé sérstaklega ætlað þeim sem neiti vímuefna í æð. „Ljóst er að slíkum hópi manna munu fylgja ýmiss konar félagsleg vandamál sem munu koma harkalega niður á þeirri starfsemi sem nú blómstrar á svæðinu,“ segir í kærunni.
Athugasemdir