Meðlimir hljómsveitarinnar Sigur Rósar, þeir Georg Holm og Jón Þór Birgisson, auk fyrrverandi meðlimanna Kjartans Sveinssonar og Orra Páls Dýrasonar, hafa verið ákærðir fyrir skattsvik. Ákærur hafa verið birtar þeim fyrir að telja ekki fram tekjur og arðgreiðslur. RÚV greinir frá.

Hljómsveitarmeðlimirnir eru ákærðir fyrir að standa ekki skil á efnislega réttum skattframtölum á árunum 2011 til 2014, nema Kjartan, sem ákærður er vegna gjaldáranna 2012 til 2014. Jóni Þór, sem þekktur er sem Jónsi, er gefið á sök að hafa komið sér undan greiðslu þrjátíu milljóna króna í tekjuskatt og þrettán milljóna í fjármagnstekjuskatt.

Í yfirlýsingu segjast hljómsveitarmeðlimir harma að héraðssaksóknari hafi tekið ákvörðun um að ákæra. Hljómsveitarmenn hafi haft fullan ásetning til að standa í réttum skilum við skattyfirvöld og hafi staðið í þeirri trú að það hefði verið gert.  „Hljómsveitarmeðlimir eru tónlistarmenn og ekki sérfróðir í bókhaldi og alþjóðlegum viðskiptum – hvað þá í framtalsgerð og skattskilum,“ segir í yfirlýsingu frá Bjarnfreði Ólafssyni frá LOGOS lögmannsþjónustu.

Georgi er gefið að sök að komast hjá greiðslu 35 milljón króna í tekjuskatt og 9,5 milljóna í fjármagnstekjuskatt. Kjartan, sem hætti í hljómsveitinni fyrir sex árum, er sakaður um að koma sér undan greiðslu 18 milljóna króna í skatt.

Þá er Orri Páll Dýrason, sem hætti í hljómsveitinni í október í kjölfar ásökunar um nauðgun, sagður hafa komist undan 36 milljónum króna í tekjuskatt og 9,5 milljónum í fjármagnstekjuskatt.

Eignir hljómsveitarmeðlima voru kyrrsettir í desember 2017 vegna rannsóknar málsins. Krafa Tollstjóra nam alls 800 milljónum króna.

Yfirlýsingin frá Sigur Rós í heild

Skil á skattframtölum hljómsveitarmeðlima fyrir árin 2010-2014 hafa verið til skoðunar hjá yfirvöldum í nokkur ár. Í desember síðastliðnum féllst ríkisskattstjóri á allar innsendar upplýsingar og útskýringar og því er enginn ágreiningur á milli þeirra og skattyfirvalda. 

Héraðssaksóknari hefur hins vegar tekið ákvörðun um að ákæra hljómsveitarmeðlimi vegna vanframtalinna tekna. Hljómsveitarmeðlimir harma að málið þurfi að fara fyrir dóm en vonast á sama tíma til þess að málsástæður þeirra skýrist. Þeir hafi ávallt haft fullan ásetning til að standa í réttum skilum við skattyfirvöld og stóðu í þeirri trú að það hefði verið gert. 

Bjarnfreður Ólafsson, LOGOS lögmannsþjónustu: „Hljómsveitarmeðlimir eru tónlistarmenn og ekki sérfróðir í bókhaldi og alþjóðlegum viðskiptum – hvað þá í framtalsgerð og skattskilum. Þess vegna réðu þeir viðurkennda sérfræðinga til að annast bókhald og öll samskipti við íslensk skattyfirvöld. En í ljós hefur komið að röngum framtölum var skilað til ríkisskattstjóra og/eða þeim skilað alltof seint. Á sama tíma töldu hljómsveitarmeðlimir að þessi mál væru í lagi og í höndum fagmanna. Það verður núna verkefni Héraðssaksóknara að færa sönnur fyrir því að hljómsveitarmeðlimir hafi sjálfir gerst sekir um stórfellda vanrækslu á framtalsskyldu sinni. Í ljósi málsatvika fæ ég ekki séð hvernig það verður hægt og þess vegna veldur það vonbrigðum að embætti Héraðssaksóknara hafi tekið ákvörðun um ákærur á hendur þeim.“