Bára Hall­dórs­dóttir, upp­ljóstr­ari í Klaust­urs­mál­inu, hefur verið boðuð til þing­halds í hér­aðs­dómi Reykja­víkur klukkan korter yfir þrjú í dag. Boðað hefur verið til sam­stöðu­fundar henni til stuðn­ings á meðan þing­hald stendur yfir.

Á þriðju­dag barst Báru bréf frá hér­aðs­dómi þar sem fram kom að mál kynni að vera höfðað gegn henni. Í bréf­inu segir að beiðni hafi komið frá Reimari Pét­urs­syni lög­manni, fyrir hönd fjög­urra ein­stak­linga, um vitna­leiðslur og öflun sýni­legra sönn­un­ar­gagna.

Þeir ein­stak­lingar eru Sig­mundur Davíð Gunn­laugs­son, Gunnar Bragi Sveins­son, Bergþór Ólason og Anna Kolbrún Árna­dóttir, þing­menn Mið­flokks­ins, sem voru á Klaustri bar 20. nóv­em­ber síð­ast­lið­inn og náð­ust á upp­töku að fara hörðum orðum um kven­kyns stjórn­mála­menn og ræða póli­tíska fyr­ir­greiðslu.

Bára fram í for­síðu­við­tali í Stund­inni 7. des­em­ber síð­ast­lið­inn og afhjúpaði sig sem mann­eskj­una sem tók upp sam­töl stjórn­mála­mann­anna.

Á Facebook síðu Báru til stuðn­ings er boðað til sam­stöðu­fundar með henni. Þess er óskað að fólk geymi hvers kyns mót­mæla­að­gerðir þar til fund­ur­inn er yfir­stað­inn og mæti ekki í gulum vestum, að ósk Báru. Gul vesti hafa verið tákn­mynd mót­mæla í Frakk­landi und­an­farnar vikur.

Þá er áréttað mik­il­vægi þess að hóp­ur­inn hamli ekki aðgengi hjóla­stóla að hér­aðs­dómi, gefi Báru rými og þrýsti ekki á hana eða lög­menn hennar um við­töl.