„Við erum búin að vera að fá þessar fréttir í bútum og alltaf þegar maður heldur að þeir geti ekki lagst lægra, þá leggj­ast þeir lægra,“ segir Oddný Harð­ar­dóttir, þing­maður Sam­fylk­ing­ar­innar og fyrr­ver­andi for­maður flokks­ins, í sam­tali við Stundina. „Hvernig þeir ræða um Albertínu og Freyju Haralds er svo svaka­legt að ég get ekki séð fyrir mér að þessir menn sitji áfram á Alþingi Íslend­inga.“

Óhætt er að segja að and­rúms­loftið á Alþingi Íslend­inga sé raf­magnað þessa stund­ina. Fundað hefur verið á öllum hæðum þings­ins vegna upp­ljóstrana Stund­ar­innar og DV um ummæli þing­manna Mið­flokks­ins og Flokks fólks­ins en þing­mönnum er almennt brugðið vegna þess sem komið hefur fram. Þær Inga Sæland, for­maður Flokks fólks­ins, Oddný G. Harð­ar­dóttir, þing­maður Sam­fylk­ing­ar­innar, og Silja Dögg Gunn­ars­dóttir, þing­maður Fram­sókn­ar­flokks­ins, sem allar voru til umræðu á upp­tök­unum sendu nú fyrir skemmstu frá sér yfir­lýs­ingu þar sem þær for­dæma ummælin sem látin voru falla á Klaustri bar þann 20. nóv­em­ber síð­ast­lið­inn og segj­ast lýta þau alvar­legum augum.

„Það sem mér finnst vera alvar­legt í þessu er að þarna eru menn í valda­stöðum að tala mjög niðr­andi um konur, upp­nefna þær og nota upp­nefni á kyn­færum til þess að taka konur niður í umræð­unni“

Albertína Frið­björg Elí­as­dóttir, þing­kona Sam­fylk­ing­ar­innar, seg­ist kjaft­stopp yfir orðum Gunnars Braga Sveins­sonar og Bergþórs Ólasonar um meintar #MeToo sögur þeirra af henni, en þeir sögðu hana meðal ann­ars hafa reynt að nauðga sér. Þá má heyra þing­menn­ina gera grín að Freyju Har­alds­dóttur og einn þeirra hermir eftir sel þegar talið berst að henni. Oddný segir að með þessum ummælum sínum gagn­vart Freyju og Albertínu hafi þing­menn­irnir farið yfir „lín­una stóru“. Hún sjái ekki að þeim sé lengur sætt á Alþingi Íslend­inga.

Stundin hitti Oddnýju í alþing­is­hús­inu fyrir stuttu. „Það sem mér finnst vera alvar­legt í þessu er að þarna eru menn í valda­stöðum að tala mjög niðr­andi um konur, upp­nefna þær og nota upp­nefni á kyn­færum til þess að taka konur niður í umræð­unni, og þetta er bara eitt­hvað sem á ekki að eiga sér stað og alls ekki á milli kjör­inna full­trúa,“ segir Oddný. Hún telur upp­ljóstr­anir um niðr­andi ummæli þing­manna Mið­flokks­ins og Flokks fólks­ins gagn­vart stjórn­mála­konum draga fram hvernig karlar í valda­stöðum tala um konur.

„Það er algjör­lega ólíð­andi að karlar í valda­stöðum sýni slíka kven­fyr­ir­litn­ingu og tjái sig á jafn niðr­andi hátt um konur og sam­kyn­hneigða. Þá skiptir einu hvort um er að ræða póli­tíska and­stæð­inga eða sam­herja,“ segja þær Oddný Harð­ar­dóttir, Silda Dögg og Inga Sæland í yfir­lýs­ingu sinni. Þær bæta við að ummælin opin­beri við­kom­andi karl­menn og dæmi sig sjálf. „Hegðun þeirra er ekki til þess fallin að auka virð­ingu almenn­ings á Alþingi eða á stjórn­mála­mönnum og setur sam­starf og trúnað í upp­nám.“ Þá minna þær á siða­reglur sem alþing­is­menn hafi und­ir­geng­ist og óska eftir því að málið verði tekið upp í for­sætis­nefnd Alþingis.