Sigríður Á. Andersen dómsmálaráðherra fullyrðir að aukna tíðni vopnaðra útkalla sérsveitar ríkislögreglustjóra á árunum 2016-2017 megi skýra af aukinni tíðni tilkynninga vegna vopnaðra einstaklinga. Útköllum sérsveitar ríkislögreglustjóra fjölgaði um 175 prósent á milli áranna 2016-2017. Á sama tíma fjölgaði tilkynningum um vopnaða einstaklinga um 109 prósent. Þannig fjölgaði vopnuðum útköllum sérsveitarinnar töluvert umfram tilkynningar um vopnaða einstaklinga á þessu sama tímabili. Ráðherra nefnir einnig breytingu á eðli brota og „samsetningu brotamanna í landinu“ sem ástæður fyrir auknum vopnaburði lögreglu, í svari við skriflegri fyrirspurn Smára McCarthy, þingmanns Pírata.

Spyr um vopnuð útköll Smári McCarthy, þingmaður Pírata, lagði fram skriflega fyrirspurn um vopnuð útköll sérsveitar ríkislögreglustjóra.

Þingmaðurinn spyr meðal annars hver skýringin sé á töluvert aukinni tíðni slíkra verkefna og útkalla á árinu 2017 umfram önnur ár. Ráðherra, sem vísar í upplýsingar frá embætti ríkislögreglustjóra, segir að „tilkynningum um fjölda vopnaðra einstaklinga fjölgað undanfarin ár og þar af leiðandi útköllum til að sinna þeim verkefnum.“

Sérsveit ríkislögreglustjóra fór í 52 vopnuð útköll árið 2003 en þeim fjölgaði jafnt og þétt næsta áratuginn eða svo og voru þau orðin 108 árið 2016. Slíkum útköllum fjölgaði svo snarlega upp í 298 árið 2017 og þrefölduðust þannig næstum því á milli ára. Þá fór fjöldi tilkynninga um vopnaða einstaklinga frá því að vera 65 árið 2011 yfir í 83 árið 2016. Ári síðar var tilkynnt um 174 slíkt tilfelli, að því er fram kemur í tölum sem ráðherra birtir frá ríkislögreglustjóraembættinu.

Þingmaðurinn spyr einnig hvaða breytingar hafi verið gerðar á starfsreglum, málaflokkum eða aðgerðavenjum lögreglu á undanförnu ári. Í svari dómsmálaráðherra kemur fram að ekki hafi verið gerðar neinar breytingar á þessum sviðum varðandi sérsveit ríkislögreglustjóra. Þá spyr hann ráðherra hvort þaðsé í samræmi við stefnu ríkisstjórnarinnar í löggæslumálum að fjölga vopnuðum verkefnum og útköllum lögreglu. Ráðherra segir svo ekki vera. Það sé hinsvegar hlutverk lögreglu að bregðast við þeim tilkynningum sem henni berast í samræmi við ákvæði lögreglulaga.