Íbúar í Ain al-Helweh, flóttamannabúðum Palestínumanna í Líbanon, lýstu ótta sínum og undrun daginn eftir mannskæða árás sem Ísraelar sögðu hafa beinst að bækistöð Hamas, en palestínsku vígasamtökin höfnuðu þeirri staðhæfingu.
Árásin í fyrrakvöld, sem líbönsk yfirvöld sögðu að hefði kostað 13 manns lífið, var sú versta síðan vopnahlé tók gildi á síðasta ári milli Ísraels og Hezbollah. Einnig er vopnahlé í gildi á Gaza-svæðinu. Þar segja yfirvöld að 11 hafi verið drepin í árás Ísraela í dag.
Neyðarstarfsmenn voru enn að safna saman líkamsleifum í dag á svæði eyðileggingarinnar, sem er nálægt einum af inngöngunum að yfirfullum og fátæklegum flóttamannabúðunum, að sögn fréttaritara AFP.
„Sprengjuárásin í gærkvöldi átti sér stað á meðan fólk var heima hjá sér að búa sig undir háttinn,“ sagði Mohammed Mustafa, 67 ára íbúi í búðunum, við AFP.
„Við heyrðum hljóðið í þremur flugskeytum, svo hristist heimili okkar. Börnin skulfu af ótta.“
Í morgun veittu palestínskar fylkingar blaðamönnum aðgang að svæðinu – mannvirki með málmþaki nálægt bílastæði og mosku – eftir að hafa áður komið á öryggisgirðingu.
Samkvæmt langvarandi hefð heldur líbanski herinn sig utan búðanna og lætur palestínskum fylkingum eftir að sjá um öryggismál.
Blóð litaði bygginguna að innan, sem og veginn sem lá að því. Þakið var að mestu fokið af og veggirnir götóttir af sprengjubrotum.
Wadih Ali, 40 ára leigubílstjóri sem býr í aðliggjandi byggingu, sagði að svæðið væri „ekki lokað svæði, hver sem er gat farið þangað inn“.
„Yfir sumarið var þar sundlaug fyrir börn og nýlega var því breytt í fótboltavöll,“ sagði hann.
Á jörðinni meðal rústanna voru leifar af nokkrum lituðum, samlæsanlegum gólfflísum sem stundum finnast á leik- eða æfingasvæðum, þó engar skýrar vísbendingar væru um til hvers árásarsvæðið var notað.
AFP gat ekki staðfest aldur eða deili á þeim sem létust með óháðum hætti. Ísrael sagðist í dag hafa haldið áfram og gert loftárásir á meintar vopnageymslur Hezbollah á nokkrum stöðum í suðurhluta Líbanon. Vopnin séu brot á vopnahléi, en á móti heldur Ísreal hermönnum inni á líbönsku landsvæði, andstætt samkomulaginu.
Segja fótboltavöll hafa verið á svæðinu
Nálægt svæðinu við flóttamannabúðirnar sem varð fyrir sprengjum voru skemmd heimili, brunnir bílar og verslunarframhliðar með brotnu gleri.
Skólum og stofnunum í búðunum var lokað vegna sorgar.
Ísraelsher sagði í yfirlýsingu að hann hefði „ráðist á hryðjuverkamenn sem störfuðu í æfingabúðum Hamas á Ain al-Helweh svæðinu“.
Hamas kallaði hins vegar fullyrðingar Ísraels „hreinan uppspuna og lygar“ og fullyrti að samtökin hefðu engin hernaðarmannvirki í búðunum í Líbanon.
Samtökin sögðu að svæðið „væri opinn íþróttavöllur sem ungmenni búðanna sæktu“ og að „þeir sem urðu fyrir árásinni væru hópur ungra drengja“ sem notuðu hann á þeim tíma.
Ain al-Helweh slapp að mestu við átök í meira en ár milli Ísraels og Hezbollah áður en vopnahléð tók gildi í nóvember síðastliðnum.
Átökin hófust þegar Hezbollah hóf skothríð yfir landamærin til Ísraels í október 2023 til stuðnings palestínskum bandamönnum sínum, Hamas, í Gaza-stríðinu.
Árásir í vopnahléi
Ísrael hefur haldið áfram reglulegum árásum á Líbanon þrátt fyrir vopnahléð – yfirleitt með þeim rökum að þeir beinist að Hezbollah, en stundum einnig Hamas – og hefur enn hermenn á sumum svæðum í suðurhluta Líbanon.
Ain al-Helweh og aðrar flóttamannabúðir voru stofnaðar fyrir Palestínumenn sem voru hraktir á brott eða flúðu í stríðinu 1948 sem fylgdi stofnun Ísraels.
Í Líbanon búa um 222.000 palestínskir flóttamenn, samkvæmt flóttamannastofnun Sameinuðu þjóðanna, UNRWA.
Jamal Shreidi, 65 ára, stóð nálægt skemmdum ökutækjum og lýsti yfir undrun sinni á árásinni.
„Hýsti þetta svæði, þessir bílar, hryðjuverkamenn?“ sagði hann.
„Það eina sem Ísrael hugsar um er að drepa,“ bætti hann við.
Athugasemdir (1)