Ásmundur Friðriksson, þingmaður Sjálfstæðisflokks, ferðast hátt í 50 þúsund kílómetra á ári vegna vinnu og til að rækta samband sitt við kjósendur í suðurkjördæm,i að eigin sögn. Í grein á vefnum Eyjar.net á sunnudag spyr hann hvað Píratar geri í þágu kjósenda þá daga sem þingfundir eru ekki haldnir.
Ásmundur var ökuhæsti íslenski þingmaðurinn á síðasta ári og fékk 4,6 milljónir króna endurgreiddar frá íslenska ríkinu vegna notkunar á eigin bifreið árið 2017, eða 385 þúsund krónur á mánuði. Hlaut hann mikla gagnrýni í byrjun árs vegna málsins.
Ásmundur segir það kosta mikla vinnu og ferðalög að sinna kjördæminu. „Um hver mánaðarmót frá maí 2013 hef ég í 68 skipti skilað inn aksturbókinni og geri enn,“ skrifar Ásmundur. „Ég hef aldrei fengið athugasemdir. Skrifstofa þingsins hefur heldur ekki talið ástæðu til að óska eftir frekari útskýringum.“
Skrifar Ásmundur að Alþingi starfi í um 100 daga á ári og hann nýti því 265 daga ársins í að rækta sambandið við fólkið í kjördæminu. „Það væri áhugavert ef Píratar gætu gefið okkur mynd af sínum störfum í þágu kjósenda sinna og hvernig þeir hafa ráðstafað þeim 265 dögum sem þinghald stendur ekki yfir á hverju ári.“
Hver ferð að meðaltali 300 kílómetrar
Ásmundur sætti mikilli gagnrýni í byrjun árs þegar í ljós kom að hann fékk mest endurgreitt allra þingmanna í fyrra vegna aksturskostnaðar. Félag íslenskra bifreiðaeigenda (FÍB) hefur áætlað að það kosti rúmar 2 milljónir króna á ári að reka Kia Sportage jeppling Ásmundar, miðað við notkun hans á bílnum í fyrra. Hann hafi því fengið meira en tvöfaldan kostnaðinn greiddan.
Ásmundur er þingmaður Suðurkjördæmis sem er næststærsta íslenska kjördæmið, 31.800 ferkílómetrar að stærð, á eftir Norðausturkjördæmi sem er 38.000 ferkílómetrar. Suðurkjördæmi er hins vegar langlengsta kjördæmið og býr Ásmundur í vestasta enda þess, Reykjanesbæ.
„Til að sækja þingfundi ek ég u.þ.b. 12.000 km á ári og u.þ.b. 30-35.000 km til að ferðast í kjördæminu á hverju ári,“ skrifar Ásmundur. „Ég fer um og yfir 100 ferðir um kjördæmið og er hver ferð að meðaltali 300 km. Gera má ráð fyrir að þessar ferðir sem flestar eru farnar um helgar og á kvöldin. Um allflestar þessara ferða má lesa á fésbókinn minni. Þar eru myndir af þeim sem ég hitti og oft stutt frásögn af því sem ég upplifði. Segi frá starfsemi fyrirtækja eða mannlífi á förnum vegi. Þetta hefur mælst mjög vel fyrir hjá fólki í mínu kjördæmi og langt út fyrir það.“
Aksturskostnaður þingmanna
Akstur Ásmundar hefur kostað tæpar 29 milljónir frá 2013
Lækkanir aksturgreiðslna sýna fram á kosti gagnsæis
Ásmundur þakkar fyrir „ómetanlegan stuðning“ í akstursmálinu
„Lögreglan er ekki með rannsóknarskyldu gagnvart alþingismönnum“
Þingmaður Samfylkingarinnar: „Óheppilegt fyrir þingið, ásýnd þess og störf“ en fellst samt á niðurstöðuna
Athugasemdir