Orri Páll Dýrason, trommuleikari í hljómsveitinni Sigur Rós, hefur ákveðið að hætta í hljómsveitinni vegna ásakana um nauðgun.

Tímaritið Paste Magazine greindi frá þessum ásökunum um helgina, en hafði ekki náð tali af Orra þegar fréttin birtist. Stundin hefur óskað eftir viðbrögðum vegna málsins en án árangurs.

Konan sem sakar hann um að hafa brotið gegn sér hefur hins vegar birt tölvupóstsamskipti á milli þeirra þar sem hann kveðst ekki skilja af hverju hún saki hann um að hafa gert eitthvað sem hann gerði ekki. 

Meagan Boyd, listakona í Los Angeles, birti færslu á Instagram á þriðjudag, þar sem hún sagði Orra hafa nauðgað sér í janúar 2013. Hún segist hafa verið mikill aðdáandi hans og að þau hafi hist á næturklúbbi. Þau hafi í kjölfarið gist í sama rúmi og segir hún hann hafa nauðgað sér tvisvar á meðan hún svaf.

Í færslunni segist Meagan ekki hafa greint frá reynslu sinni í tengslum við #MeToo byltinguna vegna kvíða, en í kjölfar yfirheyrslunnar yfir Dr. Christine Blasey Ford vegna ásakana á hendur Brett Kavanaugh, sem tilnefndur er sem hæstaréttardómari í Bandaríkjunum, hafi hún fundið sig knúna til þess að stíga fram. 

Orri segist ætla að hætta í Sigur Rós, þar sem hann geti ekki látið þessar alvarlegu ásakanir hafa áhrif á hljómsveitina. Þá biður um að fjölskylda sín og kona verði ekki dregin frekar inn í þetta mál. Hann muni gera allt sem í valdi sínu stendur til að losa sig „úr þessari martröð“ en af virðingu við „raunverulega þolendur ofbeldis“ muni hann þó ekki taka þann slag opinberlega.

Yfirlýsing Orra

Ég vil byrja á því að þakka vinum og vandamönnum sýndan stuðning. Það er gott að finna fyrir trausti ykkar þrátt fyrir þær alvarlegu ásakanir sem komið hafa fram á hendur mér.

Málið hefur óneitanlega tekið á mig síðustu daga. Réttlætanlegt, segja ef til vill einhverjir og hyggst ég ekki deila við það fólk. Hinsvegar bið ég einlæglega um að sama fólk beini reiði sinni í réttan farveg og að fjölskylda mín og þá sérstaklega konan mín verði ekki dregin frekar inn í þetta mál eðaumfjöllun þess. Að sama skapi vil ég biðja fólk að halda ró sinni og skipast ekki í tvær stríðandi fylkingar, þetta eru ekki réttarhöld, bara orð Meagan gegn mínum, á internetinu. 
Engum er greiði gerður með upphrópunum og gífuryrðum. 
-Hvorki mér, né henni.

Vegna umfangs þessa máls hef ég ákveðið að hætta í Sigur Rós. Sú ákvörðun er mér þungbær, en ég get ekki látið þessar alvarlegu ásakanir hafa áhrif á hljómsveitina og það mikilvæga og fallega starf sem þar hefur verið unnið síðustu ár. Starf sem er mér svo kært. 

Fram skal tekið að ég mun gera allt sem í mínu valdi stendur til að losa mig úr þessari martröð en af virðingu við raunverulega þolendur ofbeldis mun ég þó ekki taka þann slag opinberlega.

Ást

Orri