Þórólfur Gíslason, kaupfélagsstjóri á Sauðárkróki, og Gunnar Bragi Sveinsson, fyrsti þingmaður Framsóknarflokksins í Norðvesturkjördæmi, lentu í orðaskaki á opnum fundi framsóknarmanna í húsi Framsóknarflokksins á Sauðárkróki á miðvikudaginn. Samkvæmt heimildum Stundarinnar greip Þórólfur ítrekað fram í fyrir Gunnari Braga undir ræðu hans og andmælti orðum hans auk þess sem hann talaði við sessunauta sína meðan þingmaðurinn hafði orðið. Um 40 manns voru á fundinum. Svo fór að Gunnar Bragi lét Þórólf heyra það og rauk kaupfélagsstjórinn þá á dyr.

Þröngur hópur í andstöðu

Gunnar Bragi vill aðspurður ekki ræða um atburði fundarins á Sauðárkróki. Stundin hefur atburði fundarins hins vegar staðfesta frá öðrum fundarmönnum. Aðspurður um hvert efni fundarins hafi verið segir Gunnar Bragi að hann og Lilja Alfreðsdóttir hafi verið með kynningarfund í bænum um stefnu Framsóknarflokksins. „Þetta var bara almennur félagsfundur og fullt hús af fólki sem kom til að hlusta á okkur og spyrja spurninga.“

„En það er hins vegar ákveðinn hópur, mjög lítill þröngur hópur, sem vinnur gegn mér.“ 

Hann segir hins vegar aðspurður að á Sauðárkróki séu aðilar sem vilji ekki að hann verði oddviti Framsóknarflokksins í komandi þingkosningum. „Ég vil nú helst ekki vera að fjalla um þetta. En það er hins vegar ákveðinn hópur, mjög lítill þröngur hópur, sem vinnur gegn mér.“