Erlendum ríkisborgurum er tekið að fækka ört á Íslandi eftir gríðarlega fjölgun síðustu ára. Helst eru það Pólverjar og Litháar sem flytja úr landi.

Frá 2019 til 2025 fjölgaði útlendinum um 34.600 manns á landinu, úr liðlega 49 þúsund í 84 þúsund. Þeim hefur nú fækkað umn 220 frá 1. desember, samkvæmt nýjum tölum Þjóðskrár. Fækkunin er enn skarpari ef horft er til skemmra tímabils. Þannig fækkaði útlendingum um 802 á einum mánuði frá júní til júlí.

Þetta er öfugt við þróun á fyrri árum. Árið 2022 fjölgaði erlendum ríkisborgurum um ríflega þúsund í júlímánuði einum og sér. Í fyrra fækkaði þeim fyrst og þá um 83.

Þetta er í ósamræmi við mannfjöldaspá Hagstofunnar frá því í fyrra. Þar var gert ráð fyrir að liðlega 85 þúsund manns myndu flytja til Íslands, samkvæmt miðgildisspá, til ársins 2042, og að árið 2026 flyttust hingað 5.400 manns umfram brottflutta.

Íslenskum ríkisborgurum fjölgaði um 2.218 frá 1. desember til 1. ágúst, bæði aðfluttum og fæddum.

Pólverjar og Litháar eru langstærstu hópar útlendinga á Íslandi. Helsta fækkunin er í hópi þeirra.

Litháum fækkaði um 388 frá 1. desember til 1. ágúst og Lettum um 95.

Pólverjum fækkaði um 1,8%. Alls fækkaði þeim um 483 frá 1. desember, en þeir eru um 26 þúsund talsins á landinu.

Lífskjör hafa farið hratt batnandi í Póllandi á síðustu árum. Í fyrra hækkuðu laun um samtals tæplega 10% í landinu, samhliða 3,8% verðbólgu. Hagvöxtur var töluvert meiri en á Íslandi, eða um 3,3% í fhyrra og er spáð 3,6% í ár. Laun hækkuðu um 9,6% í Litháen í fyrra og er það mesta launahækkunin í löndum Efnahags- og framfarastofnunar Evrópu, OECD, ásamt Póllandi.

Til samanburðar hækkuðu laun á Íslandi um 5,3% í heildina í fyrra.

Mest fjölgun var á fólki frá Úkraínu. Um 5.500 Úkraínumenn eru á landinu og fjölgaði þeim um 241 frá 1. desember.

Einnig fjölgaði í hópi Spánverja um 155, Tyrkja um 64, Rúmena um 71, Nígeríumanna um 84 og Indverja um 51.