Íslenska ríkið hefur tekið ákvörðun um að áfrýja dómi héraðsdóms í svokölluðu plastbarkamáli til Landsréttar. Þetta kemur fram á vef Stjórnarráðs Íslands.
Þar segir að með dómi Héraðsdóms Reykjavíkur frá 21. maí síðastliðnum hafi íslenska ríkið verið dæmt skaðabótaskylt vegna plastbarkaaðgerðar sem framkvæmd var á Andemariam Teklesenbet Beyene á Karolinska háskólasjúkrahúsinu árið 2011. Háttsemi læknis Landspítala, sem kom að meðferðinni og vísaði sjúklingnum í hana, var í dómnum talin ein af orsökum tjónsins og á henni bæri íslenska ríkið vinnuveitendaábyrgð.
Læknirinn umræddi er Tómas Guðbjartsson, en hann hefur gagnrýnt úrskurðinn í yfirlýsingu og sagt hann í engu samræmi við það sem raunverulega gerðist. Þá hefur hann einnig gagnrýnt að hann hafi ekki verið kallaður til vitnis í skaðabótamáli ekkju Andemariams.
Læknirinn, Paolo Macchiarini, sem framkvæmdi aðgerðina á Andemariam í Svíþjóð, var árið 2023 sakfelldur fyrir að hafa valdið honum og tveimur öðrum einstaklingum sem undirgengust sambærilega aðgerð stórkostlegu líkamstjóni af ásetningi.
Málið vakti á sínum tíma heimsathygli og hefur verið mikið rannsakað, bæði hér á landi og í Svíþjóð.
Svo segir í yfirlýsingu ríkisins að „mikilvægt [sé] að mati ráðuneytisins að svo sérstakt og alvarlegt mál fái umfjöllun á æðra dómstigi og að niðurstaða þess og röksemdir teljist eins óumdeildar og unnt er, ekki einungis fyrir þetta mál heldur sem leiðarljós fyrir íslenskt heilbrigðiskerfi og heilbrigðisstarfsmenn til framtíðar.“
Athugasemdir