„Þetta er niðurstaðan og ég tel að dómafordæmi frá Mannréttindadómstólnum gefi vísbendingar um að þessi niðurstaða sé langt frá því að vera rétt,“ segir Gunnar Ingi Jóhannsson, lögmaður Aðalsteins Kjartanssonar, aðstoðarritstjóra Heimildarinnar.
Páll Vilhjálmsson bloggari var sýknaður í Landsrétti í júní sem hann lét falla um Aðalstein. Hæstiréttur hafnaði því í gær að taka málið fyrir.
Aðalsteinn stefndi Páli vegna skrifa og vann málið í héraðsdómi en Landsréttur snéri dómnum í kjölfarið við. Skrif Páls vörðuðu umfjöllun Aðalsteins og annarra blaðamanna um svokallaða „skæruliðadeild Samherja“ sem beitti sér í opinberri umræðu um Samherjamálið sem varðar meintar mútugreiðslur í Namibíu og skattaundanskot tengdum alþjóðlegum rekstri útgerðarfyrirtækisins.
Páll sakaði blaðamennina um að hafa haft aðild að byrlun á skipstjóra Samherja. Lögreglan á Norðurlandi eystra rannsakaði byrlunarmálið í þrjú ár en felldi það niður í fyrra.
Auðvitað ber að bera þetta mál undir Mannréttindadómstólinn í Strassbourgh enda varðar það störf blaðamanna sem og okkur öll.
Það er ætíð farsælt að sýna fyllstu varkárni og fullyrða fremur minna en of mikið. Pistlahöfundurinn sem málið snýst um hefur orð á sér að fara oft of langt í fullyrðingum sínum. Blaðamaðurinn hefur kappkostað að vanda sín störf og bera að virða þau.