Aukin tíðni verður á fjölda leiða Strætó á höfuðborgarsvæðinu auk þess sem þjónustutími á kvöldin lengist. Ein af ástæðum breytinganna er að Strætó dregur með þessu til baka skerðingar sem urðu á tíma samkomutakmarkana vegna Covid-19 faraldursins.

Þetta kemur fram í tilkynningu frá Strætó. „Strætó mun stórauka þjónustu sína en frá og með 17. ágúst 2025 verður umfangsmikil þjónustuaukning í almenningssamgöngum á höfuðborgarsvæðinu,“ segir í tilkynningunni. „Þessi aukning er hluti af Samgöngusáttmálanum og rekstraráætlun Strætó og skref í átt að Nýju leiðaneti, sem á að taka gildi árið 2031.“

Með breytingunum fer hlutfall íbúa sem búa innan 400 metra frá stoppistöð með 10 mínútna tíðni á annatíma úr um 18% í rúmlega 50%. Aukin verður tíðni á annatíma á leiðum 3, 5, 6 og 12 úr 15 mínútum í 10. Á leiðum 19, 21 og 24 eykst tíðni á annatíma úr 30 mínútum í 15 mínútur. Utan annatíma eykst tíðni leiða 3, 5, 12 og 15 úr 30 mínútum í 15.

Lengri þjónustutími á kvöldin á fjórtán leiðum: 1, 2, 3, 4, 5, 6, 7, 11, 12, 15, 18, 19, 21 og 24. Vagnar munu hins vegar ekki bíða eftir tengingum við aðra vagna í Ártúni á annatíma vegna aukinnar tíðni.

Markmið breytinganna eru að auka notkun almenningssamgangna, bæta aðgengi íbúa að samgöngum með góðri tíðni, venja fólk við tíðni framtíðarinnar og draga úr umferð með auknum valkostum við einkabílinn.

Með þessu verða dregnar til baka skerðingar frá Covid-tímanum að því er segir í tilkynningunni. Þá eru breytingarnar liður í undirbúningi fyrir framkvæmdir við 1. áfanga Borgarlínu.