Neytendastofa hefur ákveðið að beita fjögur fyrirtæki, sem sinna bílastæðaþjónustu við gjaldskyld bílastæði, stjórnunarsektum. Voru upplýsingagjöf og viðskiptahættir fyrirtækjanna ekki talin samræmast lögum. Hæstu sektina fær Parka, eða milljón krónur en önnur fyrirtæki sem voru sektuð eru Isavia, EasyPark og Green Parking. 

„Neytendastofa komst að þeirri niðurstöðu að fyrirtækin hefðu brotið gegn lögum um góða viðskiptahætti sem og reglum um verðmerkingar með því að veita ekki upplýsingar um öll gjöld tengd stæðunum.

Þá taldi stofnunin um að ræða brot gegn lögum í þeim tilvikum þar sem afmörkun gjaldskyldra bílastæða var ekki nægilega skýr auk þess sem það teldust villandi viðskiptahættir að láta líta út fyrir að sjálfvirk greiðslukerfi eða gjaldtaka væru til staðar án þess að taka fram að slíkt þyrfti að virkja sérstaklega eða kerfið ekki til staðar,“ segir í tilkynningu á vef Neytendastofu.

Í tilfelli Parka ályktaði eftirlitsstofnunin að fyrirtækið hefði brotið gegn reglugerð um viðskiptahætti „sem teljast undir öllum kringumstæðum óréttmætir með því að upplýsa neytendur ranglega um að þjónusta þess sé endurgjaldslaus.“

EasyPark var meðal annars sektað fyrir að birta ekki upplýsingar um kostnað við notkun smáforrits félagsins á miðum á greiðsluvélum Bílastæðasjóðs Reykjavíkur.

Green Parking var gagnrýnt fyrir að tilgreina ekki vangreiðslugjald á bílastæðum í Hamraborg og við Landspítalann á Hringbraut. En það braut í bága við reglur um verðupplýsingar við sölu á þjónustu.