Keflavíkurflugvöllur hefur ákveðið að loka aðstöðu leigubílsstjóra við völlinn frá og með þriðjudeginum 10. júní.

Deilur hafa staðið um aðstöðuna, meðal annars vegna kergju um bænahald leigubílstjóra þar inni. Fjölda leigubílsstjóra hefur verið vísað frá flugvellinum vegna brota á reglum.

„Leigubílstjórar hafa haft aðgang að afdrepi við leigubílasvæðið, þ.e. geymsluskúr þar sem einnig eru salerni og setuaðstaða,“ segir í tölvupósti frá Isavia til leigubílstjóra.

„Í kjölfar umræðu um nýtingu á þessu afdrepi var fyrirkomulag aðstöðunnar tekið til skoðunar. Fyrsta skrefið í þeirri vinnu var úttekt á húsnæðinu sem leiddi í ljós að ástand þess er bágborið. Því hefur verið ákveðið að loka afdrepinu.

Rétt er að það komi skýrt fram í þessum pósti að ástæða lokunarinnar er bágborið ástand afdrepsins sem ræðst eingöngu af viðhaldsskorti sem við sem eigandi aðstöðunnar berum ábyrgð á.“

Leigubílstjórum er héðan af bent á að nota salernisaðstöðu í flugstöð eins og aðrir þjónustuaðilar á flugvellinum gera. Leigubílstjórar munu einnig hafa áfram aðgengi að mötuneyti í flugstöðinni sem er opið öllum starfsmönnum.

Vegna ábendinga frá gestum flugvallarins um leigubílaþjónustu og „ógagnsæja verðlagningu“ verður einnig hafin vinna við að betrumbæta leigubílaþjónustu, verðlagningu og umgjörð hennar. Starfsfólk á vegum vallarins er nú á vöktum á háannatíma til að hjálpa notendum leigubíla og upplýsa þá um réttindi sín.