Bakterían sem veldur hermannaveiki fannst nýverið í vatni í einu húsi í Holtunum í Reykjavík og veiktist ein manneskja af hermannaveiki. Þetta staðfestir Heilbrigðiseftirlit Reykjavíkur.
Að ósk embættis landlækis tók heilbrigðiseftirlitið vatnssýni á Vatnsholti og greindist þar baktería í einu húsi. „Hreinsun var gerð sem felst í því að dæla 70 gráðu heitu vatni um kerfið,“ segir í svari Heilbrigðiseftirlitsins við fyrirspurn Heimildarinnar.
„Aðeins einn veiktist en fullfrískir veikjast yfirleitt ekki“
„Það er því væntanlega orðið hreint aftur og hafa sýni verið tekin á ný til að staðfesta það og berst niðurstaða eftir 10 daga. Málið ætti að vera úr sögunni. Aðeins einn veiktist en fullfrískir veikjast yfirleitt ekki.“
Smit áður komið upp
Hermannaveiki orsakast af bakteríunni legionella pneumophila og eru náttúruleg heimkynni hennar í vatni. Smit geta orðið þegar svifúði myndast frá vatnsleiðslum eða vatnstönkum og berst í öndunarveg fólks. Alvarleg veikindi verða helst hjá fólki með undirliggjandi áhættuþætti. Eru þeir til dæmis hár aldur, reykingar, langvinnir lungnasjúkdómar, ónæmisskerðing, áfengissýki og nýrnabilun. Þá eiga smit milli mannfólks sér ekki stað.
Samkvæmt upplýsingum frá Heilbrigðiseftirliti Reykjavíkur finnst bakterían endrum og eins. Getur það gerst þegar vatnskerfi í íbúðum eru ekki notuð í nokkra mánuði, til dæmis vegna dvalar erlendis.
Árið 2019 veiktist einn íbúi á hjúkrunarheimili Droplaugarstaða af hermannaveiki og náði fullum bata. Greip Heilbrigðiseftirlit Reykjavíkur þá einnig til aðgerða til að uppræta bakteríuna úr lagnakerfi hússins.
Helstu einkenni hermannaveiki eru hiti, hrollur, hósti, beinverkir, höfuðverkur, lystarleysi og stundum niðurgangur, að því fram kemur á Vísindavefnum. „Lungnabólga er alltaf hluti af sjúkdómsmyndinni. Gangur sjúkdómsins er misslæmur og dauðsföll verða í 5–30% tilfella. Meðgöngutími hermannaveiki er 2–10 dagar.“
Athugasemdir