„Ég ætla ekki að sitja hér og segja að það sé í lagi að við séum með tíu þúsund börn sem búa við þessar aðstæður vegna þess að það er ekki í lagi.“

Þetta segir Ásmundur Einar Daðason mennta- og barnamálaráðherra í þættinum Pressu sem er á dagskrá Heimildarinnar í hádeginu í dag.

Tvær skýrslur þar sem fátækt hefur verið mæld á Íslandi hafa komið út að undanförnu.

Í skýrslu UNICEF, Barnahjálpar Sameinuðu þjóðanna, kemur fram að 12,4 prósent barna á Íslandi búa við fátækt en það eru um 10.500 börn. Í skýrslunni segir að yfirvöld margra ríkra landa hafi sofið á verðinum á góðæristímum. Að í stað þess að uppræta fátækt í efnahagslegri velsæld hafi hún aukist í mörgum efnuðustu ríkjum heims.

Staða einhleypra foreldra „sérstaklega alvarleg“

Í hinni skýrslunni sem birtir niðurstöður rannsóknar Vörðu – rannsóknastofnunar vinnumarkaðarins og Öryrkjabandalagsins kemur fram að stór hluti fatlaðs fólks á Íslandi er sárafátækur. Meira en helmingur metur fjárhagsstöðu sína nokkuð eða mun verri en fyrir ári. Staða einhleypra foreldra er sérstaklega alvarleg. Tæplega helmingur einhleypra foreldra getur ekki veitt börnum sínum nauðsynlegan klæðnað og næringarríkan mat. Um fjögur af hverjum tíu geta ekki gefið börnum sínum jóla- og afmælisgjafir. Fjórðungur einhleypra mæðra þurftu mataraðstoð á síðastliðnu ári og ríflega átta af hverjum tíu einhleypum foreldrum búa við slæma andlega heilsu. 

„Þessar skýrslur tökum við mjög alvarlega en ég myndi líka vilja sjá miklu meiri pólitíska umræðu um hvernig við ætlum að ná þessum börnum. Vegna þess að eitt barn sem býr við fátækt er einu barni of mikið,“ segir Ásmundur Einar. 

Barnamálaráðherra: „Þurfum að gera betur“

Hann segir einnig að það sé „gríðarlega mikilvægt“ að bæta stöðu fatlaðra foreldra og þeirra sem séu á örorku. „Félagsmálaráðherra er að vinna að endurskoðun örorkukerfisins með aukningu þar inni í huga. Ég styð hann eindregið í að ná árangri í að bæta almenna stöðu þessa hóps.“

Ásmundur segir að skýrslurnar sýni að við séum „að falla þarna“ og er að vísa til fjölgunar í hópi fátækra barna. Hann segist taka niðurstöðunum alvarlega. „Þegar við búum í landi sem er jafnríkt og það er og við erum með 10 þúsund börn sem mælast með einhvern veraldlegan skort sem tengist húsnæðismálum, íþróttum æskulýðs- og tómstundastarfi, þá þurfum við að gera betur.“

Í Pressu í dag verður einnig rætt um fátækt við þær Krist­ínu Hebu Gísla­dótt­ur, fram­kvæmda­stjóra Vörðu – rann­sókna­stofn­un­ar vinnu­markaðar­ins, Elínu Ebbu Ásmundsdóttur, framkvæmdastjóra Hlutverkaseturs og Ingu Sæland, þingkonu og formann Flokks fólksins. Útsending hefst klukkan 12.00 á hádegi.