Fasteignafélögin Eik og Reitir fengu undir lok júlí jákvæðar undirtektir frá skipulagsfulltrúanum í Reykjavík varðandi tillögu að framtíðaruppbyggingu á svæðinu á bakvið Hilton Nordica-hótelið við Suðurlandsbraut. Tillaga arkitektastofunnar Arkþing-Nordic fyrir hönd fasteignafélaganna tveggja gerir ráð fyrir að þar geti risið allmörg ný fjölbýlishús með þjónustu á jarðhæðum.
Frumdrögin gera ráð fyrir heildarbyggingarmagni upp á 21.500 fermetra auk 7.700 fermetra bílakjallara. Þar af yrðu u.þ.b. 18.900 fermetrar hugsaðir undir íbúðarhúsnæði og 2.600 fermetrar undir verslun og þjónustu.
Í umsögn skipulagsfulltrúa, sem samþykkt var á afgreiðslufundi embættisins 27. júlí, segir að tillagan sýni „áhugaverðar hugmyndir að torgum og göngugötum sem jafnframt eru íbúðargötum“ og jafnframt „áhugaverða hugmynd að grænum inngarði til suðurs með djúpum jarðvegi svo tré fái þrifist“. Þá sé áhersla „lögð á góð útirými og góðar gönguleiðir sem tengja Ármúla við stoppistöðvar Borgarlínu við Suðurlandsbraut“.
Sjö til níu hæðir kannski full hátt
Skipulagsfulltrúi segist taka jákvætt í fyrirliggjandi frumdrög að uppbyggingu og segir í umsögn embættisins að hugmyndir um blandaða byggð og íbúðargöturými séu „áhugaverðar og vel útfærðar“.
Hins vegar vakni spurningar um byggingarmagn og hæðir húsa, en skipulagsfulltrúi segir að þær teljist „full háar“, sérstaklega á horni Suðurlandsbrautar og Lágmúla, en teikning úr tillögunni sýnir þar 9 hæða hátt hús, og við Hallarmúla, þar sem 7 hæða hús er sýnt á teikningu. Einnig segir skipulagsfulltrúi að spurningar vakni um „afstöðu fjölbýlishúss á austasta hluta lóðar til atvinnuhúsnæðis að Hallarmúla 2“.
Í umsögn skipulagsfulltrúa segir að vinna þurfi greiningu á kolefnisspori uppbygingarinnar samhliða hönnun, ásamt greiningu á dagsbirtu íbúða. Þá þurfi að vinna samgöngumat fyrir uppbyggingu, sem skuli leggja til grundvallar ákvörðunar um fjölda bíla- og hjólastæða á svæðinu ásamt bíla- og hjólastæðastefnu Reykjavíkurborgar. Einnig kemur fram að samþætta þurfi hugmyndir að uppbyggingu á þessu svæði við þróunaráætlun fyrir Múla, sem sögð er á lokastigi.
Fasteignafélögin Eik og Reitir eiga sinn hvorn hlutann af svæðinu sem um ræðir. Reitir eiga húsnæði Nordica-hótelsins og einnig atvinnuhúsnæðið við Hallarmúla 2, en Eik á fasteignina við Ármúla 3, sem meðal annars hýsir höfuðstöðvar tryggingafélagsins VÍS.
Reitir hafa áður kynnt að félagið hafi áform um uppbyggingu íbúðarhúsnæðis á þessu svæði fyrir aftan Hilton-hótelið og kynnti fulltrúi félagsins þær hugmyndir meðal annars á opnum fundi um samgöngu- og skipulagsmál sem Reykjavíkurborg stóð fyrir vorið 2021. Í glærukynningu fulltrúa Reita á þeim fundi kom fram að hægt yrði að koma fyrir allt að 120 íbúðum og 1.300 fermetrum af atvinnuhúsnæði á svæðinu, í sex fjölbýlishúsum.
Athugasemdir