Eigandi Arnarlax segir engar slysasleppingar hafa verið á Íslandi þrátt fyrir sögulega sekt

Norskur eig­andi Arnarlax á Bíldudal heldur því fram að eng­inn til­felli um slysa­slepp­ingar hafi komið upp á í rekstri fyr­ir­tæk­is­ins á Íslandi í fyrra þrátt fyrir að Arnarlax hafi fengið sögu­lega sekt vegna slysa­slepp­inga það ár. Í nóv­em­ber í fyrra sektaði Mat­væla­stofnun nefni­lega Arnarlax um 120 millj­ónir króna vegna þess að fyr­ir­tækið til­kynnti ekki um strok á eld­is­löxum úr sjó­kví í Arn­ar­firði sem gat fannst á í ágúst árið 2021.  MAST hefur aldrei áður sektað lax­eld­is­fyr­ir­tæki vegna slysa­slepp­ingar hér á landi. 

Í upp­lýs­inga­gjöf norska fyr­ir­tæk­is­ins, Salmar AS, í árs­reikn­ingi fyrir 2022 er þessi sekt ekki nefnd sér­stak­lega í yfir­liti um sekt­ar­greiðslur þess og ekki er minnst á það að fyr­ir­tækið veit ekki hvað um varð um tæp­lega 82 þús­und eld­is­laxa sem voru í kvínni. 

Arnarlax og eldislaxarnir í Mjólká

Eins og annar af fyr­ir­renn­urum Heim­ild­ar­innar, Stundin, greindi frá í fyrra þá voru eld­is­laxar sem veidd­ust í  Mjólká í Arn­ar­firði raktir til Arnarlax. Í yfir­liti yfir brot Salmar á lögum og reglum í Noregi og á Íslandi, sem og sekt­ar­greiðslum fyr­ir­tæk­is­ins, kemur fram að fyr­ir­tækið hafi engin brot framið og að það hafi greitt 0 krónur í sektir á Íslandi í fyrra. 

Í árs­reikn­ingi Salmar, sem á rúm­lega 50 pró­senta hlut í Arn­ar­laxi, segir um þetta: „SalMar er með það að mark­miði að eng­inn eld­is­lax sleppi hjá fyr­ir­tæk­inu og tekur öll slík til­felli alvar­lega. Árið 2022 voru tvö slík til­felli í Noregi og ekk­ert á Íslandi. Samtals sluppu 11 laxar úr sjó­kvíum okkar í Noregi og á Íslandi, sem þýðir að minna en 0,00002 pró­sent allra laxa sem SalMar var með í sjó­kvíum sínum.“

Ein skýr­ing sem kann að vera á þessu er sú að gatið á sjó­kvínni sem lax­arnir sluppu úr fannst síð­sum­ars árið 2021 en hins vegar var slátrað úr kvínni og þá fyrst kom í ljós hversu marga laxa vant­aði í hana. Allar upp­lýs­ingar um umfang og alvar­leika slysa­slepp­ing­arnar komu því fram í fyrra. Þrátt fyrir þetta skautar Salmar AS fremur létti­lega fram­hjá bæði slysa­lepp­ing­unni sjálfri og sekt­inni fyrir hana. 

Salmar lítur svo á að málið sé opið

Í árs­reikn­ingi Salmar kemur svo fram af hverju félagið til­greinir ekki sekt­ina sem félagið fékk slysa­lepp­ing­ar­innar í  Arn­ar­firði. Ástæðan er sú að Arnarlax hefur kært sekt­ina og lítur því ekki á hana sem orð­inn hlut. „Árið 2022 braut SalMar ekki gegn neinum reglum. Arnarlax fékk sekt vegna slysa­slepp­ing­ar­innar sem til­kynnt var árið 2021, en málið er í áfrýj­un­ar­ferli og er ennþá opið,“ segir í reikn­ingnum.

Þetta er skýr­ing SalMar á því af hverju ekki er greint frá sekt­inni en í árs­reikn­ingnum er ekki að finna skýr­ingu á því af hverju félagið greinir ekki frá umfangi slysa­slepp­ing­ar­innar í árs­reikn­ingnum.

Arnarlax hefur sjálft rætt um slysa­slepp­ing­una opin­ber­lega og seg­ist ætla að læra af henni: „Arn­ar­laxi þykir mjög miður að lax hafi sloppið úr kví fyr­ir­tæk­is­ins en starfs­fólk leggur hart að sér alla daga til að koma í veg fyrir að slíkt geti gerst. Þrátt fyrir að Arnarlax telji að verk­lags­reglum hafi verið fylgt í umræddu til­viki þá mun fyr­ir­tækið draga lær­dóm af þessu óhappi,“ sagði í til­kynn­ingu á heima­síðu fyr­ir­tæk­is­ins þar sem greint var frá því að sektin hafi verið kærð. 

Kæran frá Arn­ar­laxi  er nú í ferli í mat­væla­ráðu­neyt­inu og hefur MAST meðal ann­ars skilað inn sér­stakri umsögn um hana þangað.