Engin ákvörðun hefur verið tekin um að fresta skilum starfshópsins á sinni afurð, en ráðherra, ráðuneytið og starfshópurinn telja mikilvægast af öllu að vandað verði til verka,“ segir Hafsteinn S. Hafsteinsson, starfsmaður starfshóps um nýtingu vindorku, sem skipaður var af ráðherra umhverfis-, orku- og loftlagsmála síðasta sumar. Hópurinn var skipaður um miðjan júlí og á, að því er sagði í tilkynningu ráðuneytisins, að skila tillögum sínum til ráðherra fyrir 1. febrúar næstkomandi.
Hilmar Gunnlaugsson hæstaréttarlögmaður er formaður starfshópsins, en auk hans eru Björt Ólafsdóttir, fyrrverandi ráðherra umhverfis- og auðlindamála og Kolbeinn Óttarsson Proppé, fyrrverandi alþingismaður skipuð í hópinn.
Hópurinn á m.a. skoða lagaumhverfi vindorkunýtingar og hvernig tekið yrði á ýmsum álitamálum. Að loknu mati og greiningu á viðfangsefninu er starfshópunum ætlað að vinna drög að lagafrumvarpi á grundvelli niðurstaða sinna.
Í sáttmála ríkisstjórnarinnar segir að setja skuli sérstök lög um nýtingu vindorku með það að markmiði að einfalda uppbyggingu vindorkuvera. Áhersla verði lögð á að vindorkuver byggist upp á afmörkuðum svæðum nærri tengivirkjum og flutningslínum, svo unnt verði að tryggja afhendingaröryggi og lágmarka umhverfisáhrif. Tekið er fram að mikilvægt sé að breið sátt ríki um uppbyggingu vindorkuvera og tillit sé tekið til sjónrænna áhrifa, dýralífs og náttúru; einnig að taka verði afstöðu til gjaldtöku fyrir slíka nýtingu.
Í skipunarbréfi er óskað eftir að starfshópurinn hugi m.a. að eftirfarandi spurningum og álitaefnum:
• Hvort rétt sé að virkjunarkostir í vindorku heyri áfram undir lög nr. 48/2011, um áætlun um vernd og orkunýtingu landsvæða, eða að þeir verið undanskildir þeim lögum, en að settar verði sérreglur um meðferð slíkra virkjunarkosta.
• Hvernig haga eigi samspili hagnýtingar vindorku og skipulags- og leyfisveitingarferli þegar í hlut eiga viðkvæm svæði eða viðkvæmir þættir, eins og áhrif á náttúrufar og friðlýst svæði, fuglalíf, ferðamennsku, grenndarrétt eða önnur sjónarmið.
• Hvernig ná eigi fram þeirri áherslu í stjórnarsáttmála að vindorkuver byggist helst upp á afmörkuðum svæðum nærri tengivirkjum og flutningslínum.
• Hvernig ná megi fram sem breiðastri sátt um hagnýtingu vindorku meðal landsmanna eins og einnig er fjallað um í stjórnarsáttmála.
• Hvort horfa eigi til þess að hið opinbera hafi með höndum einhvers konar forgangsröðun einstakra virkjunarkosta, heildarfjölda eða heildarstærð leyfðra vindorkuvera eða setji aðrar mögulegar skorður við vindorkunýtingu og fyrirkomulagi vindorkuvera.
• Hvernig rétt sé að haga ákvörðunar- og leyfisveitingarferli virkjunarkosta í vindorku.
• Hvernig best sé að haga gjaldtöku vegna hagnýtingar vindorku.
Fengu hálft ár
Þetta stóra verkefni hafði starfshópurinn aðeins um hálft ár til að ljúka. Að sögn Hafsteins hefur hópurinn síðustu mánuði aflað sjónarmiða einstaklinga, fyrirtækja, samtaka og stofnana og átt samtöl við þá sem sett hafa fram umsagnir en þær skipta fleiri tugum.
Einnig hefur hópurinn kynnt sér reynslu annarra og „leitað leiða til að samstilla sjónarmið um orkuþörf, orkuskipti, sanngjarna skiptingu af ávinningi hagnýtingar náttúruauðlindar, náttúruvernd, umhverfismál, aðra atvinnustarfsemi og mannlíf,“ segir Hafsteinn.
Koma ætti í ljós á næstu dögum hvort reikna megi með að starfshópurinn skili af sér fyrir mánaðamót líkt og að var stefnt.
Athugasemdir