Fólk tengt hópnum Coviðspyrnan, sem hefur staðið fyrir samkomum og umræðu á samfélagsmiðlum um sóttvarnaraðgerðir ríkisstjórnarinnar, undirbýr framboð til Alþingis. Hópurinn safnaðist fyrir utan Alþingi á laugardag og hvatti til notkunar lyfsins Ivermectin gegn Covid-19, sem rannsóknir hafa ekki sýnt hvort nýtist gegn sjúkdómnum eða ekki.

Jóhannes Loftsson, formaður Frjálshyggjufélagsins, hefur farið fyrir hópnum með greinaskrifum og skipulagningu. Stundin hefur áður fjallað um erindi sem Jóhannes flutti á fundi félagsins í desember 2019 þar sem hann sagði bráðnun jökla á Íslandi ekki vera af mannavöldum. Fundurinn var í samstarfi við Rannsóknarmiðstöð um samfélags- og efnahagsmál, sem hefur eins og Frjálshyggjufélagið verið sögulega tengt mörgum af helstu hugmyndafræðingum Sjálfstæðisflokksins. Á meðal annarra ræðumanna voru Hannes Hólmsteinn Gissurarson, prófessor í stjórnmálafræði, og tónlistarmaðurinn Ingólfur Þórarinsson, betur þekktur sem Ingó Veðurguð, sem flutti erindið „Er pönkið dautt? Listamenn í rétttrúnaðarfangelsi“.

Nú undirbýr Jóhannes hins vegar framboð undir öðrum formerkjum. „Mikill kraftur er kominn í frelsislaugardaginn nú eftir að við fórum að undirbúa framboð og mesti fjöldi mætti fram að þessu,“ skrifaði hann til kynningar viðburðinum. „Ekki veitir af því þjóðin verður að fara að vakna.“

„Eina leiðin til þess að það sé hlustað á okkur er að stofna stjórnmálaafl“

Kröfur hópsins hafa hingað til verið að yfirvöld láti af takmörkunum sínum á samkomum og starfsemi vegna faraldursins. Einnig hafa heyrst kröfur eins og „nei við prófum“ og „nei við bóluefni“, auk þess sem meðlimir hópsins hvetja til þess að lyfið Ivermectin verði leyft gegn Covid-19. Viðburðurinn var enda haldinn á því sem kallað er „Alþjóðlegur Ivermectin dagur“.

Undirbúningur stjórnmálaafls á vegum hópsins er í bígerð og hefur verið haldinn fundur þess efnis. „Eina leiðin til þess að það sé hlustað á okkur er að stofna stjórnmálaafl,“ sagði Jóhannes í ræðu á útifundinum á laugardag. „Það er merkilegt að RÚV vill ekki hleypa okkur í þáttinn sinn eða nokkuð fjalla um okkur, þannig að við erum með kosningaloforð um að útvarpsgjaldið verði í valdi hvers manns.“

Rannsókn á Ivermectin reyndist fölsk

Undanfarið ár hefur stuðningur við notkun lyfsins Ivermectin gegn Covid-19 verið áberandi á samfélagsmiðlum og því verið hampað af áhrifavöldum af hægri væng stjórnmálanna. Lyfið hefur verið notað gegn sníkjudýrum og lúsasmiti og er virkni þess að því leytinu til þekkt og studd af rannsóknum. Virkni þess gegn Covid-19 hefur hins vegar veikan vísindalegan grunn og vara bæði lyfjaeftirlit Bandaríkjanna og Alþjóðaheilbrigðisstofnunin WHO gegn því að nota lyfið í þeim tilgangi, enda sé það ekki veirulyf.

Viðburður CoviðspyrnunnarTugir komu saman fyrir framan Alþingi á laugardag og hópurinn undirbýr nú þingframboð.

Mynd: Þórdís B. Sigurþórsdóttir

The Guardian greindi nýverið frá því að ein helsta rannsóknin á notkun Ivermectin gegn Covid-19 hafi verið fjarlægð af vefnum sem birti hana vegna siðferðislegra ágalla. Rannsóknin var framkvæmd í egypskum háskóla, birt í nóvember og sögð vera svokölluð slembd klínísk tilraun (e. randomized controlled trial) með notkun viðmiðunarhópa. Niðurstaða rannsóknarinnar var að þeir sem veiktust af Covid-19 og fengu Ivermectin snemma gegn sjúkdómnum hafi hlotið góðan bata og það hafi verið 90 prósent lægri dánartíðni hjá þeim sem fengu Ivermectin en viðmiðunarhópnum.

Í mánuðinum var greinin hins vegar fjarlægð þegar í ljós kom að stór hluti hennar var falsaður og byggði á texta úr hinum og þessum fréttatilkynningum og af vefsíðum um Ivermectin sem breytt hafði verið handahófskennt. Undirliggjandi gögn hafi síðan ekki stemmt við niðurstöðu greinarinnar, þar sem aldur þátttakanda var rangt skráður, flestir sjúklinganna sem létust hafi verið látnir áður en rannsóknin hófst og fjöldi þeirra sem fengu Ivermectin og létust hafi verið hærri í gögnunum en í texta greinarinnar.

Þingmaður varar við snákaolíusölumönnum

Aðrar rannsóknir á Ivermectin eru nú í framkvæmd og eins og áður segir er ekkert staðfest um hvort eða hvernig lyfið gæti gagnast í baráttunni við Covid-19.

„Snákaolíusölumennirnir eru hins vegar afgerandi með svona sögur“

Björn Leví Gunnarsson, þingmaður Pírata, skrifaði um frétt The Guardian á Facebook sinni á dögunum. „Nú hef ég sem þingmaður fengið þó nokkra tölvupósta um þetta mál og tekið þátt í þó nokkrum umræðum á netinu,“ skrifar hann. „Það hefur verið mjög erfitt að fá fólk í þessum umræðum til þess að treysta vísindalega ferlinu - líklega af því að það er bara ekki nægilega hratt og afgerandi fyrir tilfinningar fólks. Snákaolíusölumennirnir eru hins vegar afgerandi með svona sögur og það er lykillinn að því að þekkja þá innan vísindanna. Ég vona að fólk læri af þessu.“