Dótturfélag Kaupfélags Skagfirðinga hefur ákveðið að endurgreiða 17 milljóna króna hlutabætur sem starfsmenn kjötvinnslu fyrirtækisins, Esju Gæðafæði,  fengu í apríl. Þetta kemur fram í tilkynningu frá Kaupfélagi Skagfirðinga.

Stundin fjallaði um notkun Kaupfélags Skagfirðinga á hlutabótaleiðinni fyrir helgi.

Í tikynningnni um endurgreiðsluna segir: „Að gefnu til­efni skal tekið fram að kjötvinnsl­an hef­ur aldrei greitt kaup­fé­lag­inu arð. Vegna umræðu um arðgreiðslur er áréttað að Kaup­fé­lag Skag­f­irðinga starfar á grund­velli laga um sam­vinnu­fé­lög. Af þeirri ástæðu hef­ur það alla tíð, eða í 130 ár, nýtt lang­stærst­an hluta fram­legðar starf­sem­inn­ar til innri upp­bygg­ing­ar í stað hefðbund­inna arðgreiðslna hluta­fé­laga til eig­enda sinna.“

50 prósent tekjufall

 Ágúst Andrésson, framkvæmdastjóri Esju og forstöðumaður kjötafurðastöðvar Kaupfélags Skagfirðinga, ræddi um þá ákvörðun félagsins að nýta sér hlutabótaleiðina í frétt Stundarinnar. „Esjan er fyrst og fremst matvælafyrirtæki sem þjónustar veitingahús og stóreldhús á markaði. Það þarf ekkert að hafa mörg orð um það hvaða áhrif það hefur á okkur þegar engir ferðamenn eru hér á landi. Mörgum veitingahúsum hefur verið lokað og mötuneyti eru lokuð.“ 

Ágúst sagði að tekjufall Esju vegna COVID-19 hafi verið 50 prósent í apríl.

„Það þarf ekkert að hafa mörg orð um það hvaða áhrif það hefur á okkur þegar engir ferðamenn eru hér á landi“ 

Kaupfélag Skagfirðinga keypti kjötvinnsluna Esju árið 2016 sem og kjötverslunina Gallerí Kjöt. Samkeppniseftirlitið þurfti að samþykkja kaupin á kjötvinnslunni vegna sterkrar stöðu Kaupfélags Skagfirðinga á kjötmarkaðnum á Íslandi. Esja hefur verið rekin í gamla húsnæði Osta og smjörsölunnar á Bitruhálsi í Reykjavík sem kaupfélagið keypti fyrir nokkrum árum. 

Esja var með tæplega 2,8 milljarða tekjur árið 2018 en skilaði nærri 200 milljóna tapi.

Listinn lengist

Í tilkynningunni í dag útskýrir Kaupfélag Skagfirðinga ákvörðun sína um endurgreiðsluna svona: „Með þess­ari ákvörðun er sú stefna kaup­fé­lags­ins und­ir­strikuð að leita allra leiða til þess að ná því mark­miði inn­an sam­stæðunn­ar án sér­tækr­ar aðstoðar frá ís­lenska rík­inu. Þess vegna verður feng­inn rík­is­stuðning­ur á grund­velli hluta­bót­ar­leiðar end­ur­greidd­ur.“

Þetta dótturfélag Kaupfélagsins bætist við hóp þeirra fyrirtækja sem hafa ákveðið aðendurgreiða hlutabætur. Fyrir helgi tilkynni Skeljungur meðal annars um slíka endurgreiðslu í kjölfar umfjöllunar fjölmiðla.