Stundin mun á næstu vikum senda út menningarviðburði í samstarfi við Menningarhúsin í Kópavogi. Viðburðirnir verða haldnir klukkan 13 á mánudögum, miðvikudögum og föstudögum á meðan samkomubanni stendur vegna COVID-19 heimsfaraldursins. Hægt verður að sjá viðburðina á forsíðu Stundarinnar, á Facebook-síðu Stundarinnar og Facebook-síðu Menningarhúsanna í Kópavogi.

Meðal þeirra sem koma fram í viðburðaröðinni eru Sævar Helgi Bragason stjörnufræðingur, Gerður Kristný skáld,  Jógvan, Matti Matt, Vignir Snær, Ragna Fróðadóttir, Andri Snær Magnason rithöfundur, Sigurbjörn Bernharðsson, Halla Oddný, Þorgrímur Þráinsson, Elín Björk Jónasdóttir, Einar Falur, Kordo kvartettinn og Hrönn Egilsdóttir.

Fyrsti viðburðurinn í Kúltúr klukkan 13 eru tónleikar með Jógvan Hansen, Matthíasi Matthíassyni og Vigni Snæ Vigfússyni, í dag klukkan 13. Streymi af viðburðunum verður birt í þessari frétt og á fyrrgreindum Facebook-síðum ásamt forsíðu Stundarinnar. Þá verður upptaka tiltæk á sömu stöðum í kjölfarið.

Eftirfarandi er tilkynning frá menningarhúsunum í Kópavogi um fyrsta viðburðinn:

Fyrsti viðburðurinn í röðinni Kúltúr klukkan 13

Nokkur af bestu lögum Eagles í Salnum

Fyrsti viðburðurinn í Kúltúr klukkan 13, nýjum vef-dagskrárlið Menningarhúsanna í Kópavogi, eru tónleikar með þeim Jógvan Hansen, Matthíasi Matthíassyni og Vigni Snæ Vigfússyni. Þeir félagar mæta í Salinn í Kópavogi og flytja nokkur af bestu lögum Eagles.

Hljómsveitina Eagles þekkja allir enda hefur hún boðið heimsbyggðina upp á fjöldan allan af þekktum lögum sem hafa verið mikið spiluð í gegnum árin. Má þá nefna lög á borð við Hotel California, Take it easy, Lying Eyes, Tequila Sunrise o.fl.

Jógvan, Matti og Vignir slógu í gegn á tvennum Eagles tónleikum í vetur fyrir frábæran flutning og skemmtilega kvöldstund í Salnum og eru þeir spenntir fyrir því að geta boðið landsmönnum upp á þessa fallegu tónlist Eagles -  beint heim í stofu!