Stundin mun á næstu vikum senda út menningarviðburði í samstarfi við Menningarhúsin í Kópavogi. Viðburðirnir verða haldnir klukkan 13 á mánudögum, miðvikudögum og föstudögum á meðan samkomubanni stendur vegna COVID-19 heimsfaraldursins. Hægt verður að sjá viðburðina á forsíðu Stundarinnar, á Facebook-síðu Stundarinnar og Facebook-síðu Menningarhúsanna í Kópavogi.

Meðal þeirra sem koma fram í viðburðaröðinni eru Sævar Helgi Bragason stjörnufræðingur, Gerður Kristný skáld, Jógvan, Matti Matt, Vignir Snær, Ragna Fróðadóttir, Andri Snær Magnason rithöfundur, Sigurbjörn Bernharðsson, Halla Oddný, Þorgrímur Þráinsson, Elín Björk Jónasdóttir, Einar Falur, Kordo kvartettinn og Hrönn Egilsdóttir.

Í dag verður þriðja GerðarStundin send út frá Gerðarsafni þar sem myndlistarmennirnir Bergur Thomas Anderson, Logi Leó Gunnarsson og Una Margrét Árnadóttir leiða skapandi fjölskyldusmiðju í Stúdíói Gerðar. Þau koma með skemmtilegar hugmyndir sem börn og fullorðnir geta búið til úr einföldum og aðgengilegum efnivið heima hjá sér. Fólk er hvatt til að deila mynd af sínum listaverkum á samfélagsmiðlum með myllumerkinu #gerdarstundin.

Útsendingin hefst klukkan 13. Streymi af viðburðinum verður birt í þessari frétt og á fyrrgreindum Facebook-síðum ásamt forsíðu Stundarinnar. Þá verður upptaka tiltæk á sömu stöðum í kjölfarið.

Eftirfarandi er tilkynning frá menningarhúsunum í Kópavogi um viðburðinn:

Kúltúr klukkan 13 | GerðarStundin

Föstudaginn 24. apríl  kl. 13 verður þriðja GerðarStundin send út frá Gerðarsafni þar sem myndlistarmennirnir Bergur Thomas Anderson, Logi Leó Gunnarsson og Una Margrét Árnadóttir leiða skapandi fjölskyldusmiðju í Stúdíói Gerðar. Þau koma með skemmtilegar hugmyndir sem börn og fullorðnir geta búið til úr einföldum og aðgengilegum efnivið heima hjá sér.

Fólk er hvatt til að deila listaverkum sínum með öllum með því að taka mynd og deila á samfélagsmiðlum með myllumerkinu #gerdarstundin.

GerðarStundin gefur fólkinu í landinu góðar hugmyndir fyrir samverustundir með börnunum þar sem allir fá tækifæri til að skapa saman!

Í þessum þriðja þætti verður áhorfendum kennt að búa til mósaíkverk úr ýmsum matvælum og litrík hljóðfæri úr ýmsum ílátum, blöðrum og teygjum.

Nánar um umsjónarmennina:

Bergur Thomas Anderson er myndlistar- og tónlistarmaður frá Reykjavík. Hann útskrifaðist með BA gráðu í myndlist frá Listaháskóla Íslands árið 2011 og stundaði framhaldsnám við Master Artistic Research deildina í Royal Academy of Art the Hague í Hollandi, þaðan sem hann útskrifaðist 2017. Verk hans kynna skáldaða heima og persónur í gegnum tóna og tal, keramík, teikningar og textíl. Bergur hefur sýnt víða innanlands sem erlendis. Hann hefur haldið fjölskyldusmiðjur fyrir Gerðarsafn og á eigin vegum.

Una Margrét Árnadóttir útskrifaðist með meistaragráðu frá Listaháskólanum í Malmö árið 2013 og hefur starfað við myndlist síðan þá. Hún hefur sýnt víðsvegar bæði hérlendis og erlendis. Samhliða myndlistinni hefur hún m.a kennt við Myndlistarskóla Reykjavíkur, sýningarstýrt í Harbinger ásamt því að sinna barna- og unglingafræðslu fyrir Listasafn Reykjavíkur. Auk þess má geta að Una er einn af aðstandendum sýningarýmisins OPEN í Reykjavík. 

Logi Leó Gunnarsson útskrifaðist frá myndlistardeild Listaháskóla Íslands vorið 2014. Hann vinnur í ýmsa miðla, en flest verka hans gefa frá sér hljóð. Logi hefur sýnt víða, en nýlegar sýningar sem hann hefur tekið þátt í eru Hljóðön – sýning tónlistar í Hafnarborg og Deep Inside: fimmta alþjóðlega tvíæringnum fyrir unga myndlistarmenn í Moskvu. Logi Leó hefur starfað fyrir fræðsludeild Listasafns Reykjavíkur ásamt því að hafa sinnt ýmsum verkefnum fyrir Gerðarsafn og Listasafn Íslands.