Næsta víst er að félags­menn í Sjúkra­liða­fé­lagi Íslands muni sam­þykkja verk­falls­boðun. Þetta segir Gunnar Örn Gunn­ars­son fram­kvæmda­stjóri félags­ins, en kosn­ing um boðun verk­falls stendur nú yfir. Hún hófst í gær og lýkur á morgun og þátt­taka er komin yfir það lág­mark­s­við­mið sem þarf til að hún telj­ist gild. Samn­ingar hafa verið lausir í tæpa 10 mán­uði og fólk er orðið „pirrað“, að sögn Gunnars.

Kosið er um verk­falls­að­gerðir hjá þeim sjúkra­liðum sem starfa hjá rík­inu og Akur­eyr­arbæ. Kosn­inga­þát­taka er nú komin yfir 55% hjá þeim sem starfa hjá rík­inu og yfir 58% hjá sjúkra­liðum hjá Akur­eyr­arbæ og Gunnar segir að góð þátt­taka komi sér ekki á óvart því hann hafi merkt mikla ólgu og vilja til aðgerða hjá félags­mönnum. Kosning um verk­fall hjá aðild­ar­fé­lögum BSRB stendur einnig yfir og Gunnar segir að fari svo að verk­falls­að­gerðir verði sam­þykktar hjá báðum félögum sé lík­legt að starf­semi Land­spít­al­ans lamist, en hluti starfs­fólks á Land­spít­al­anum er í aðild­ar­fé­lögum BSRB. 

Ekki bundin af Lífskjarasamningnum

Spurður í hverju kröfur sjúkra­liða felist segir Gunnar að kraf­ist verði 120 þús­und króna launa­hækk­unnar á mán­uði. Þá snú­ist kröf­urnar meðal ann­ars um stytt­ingu vinnu­vik­unnar. „Að dag­vinnu­fólk vinni 36 tíma á viku og ákveð­inn hluti vakta­vinnu­fólks fari niður í 32 tíma,“ segir hann. „Árið 2015 gáfum við frá okkur til­tekin líf­eyr­is­rétt­indi á grund­velli þess að laun yrðu jöfnuð á milli almenna mark­að­ar­ins og hins opin­bera. Það hefur enn ekki verið gert. Síðan var sett svokölluð launa­skriðs­trygg­ing - við höfum enn ekki séð hana. Og við teljum okkur ekki á neinn hátt bundin af Lífs­kjara­samn­ingnum, enda áttum við enga aðkomu að gerð hans.“

Frá BSRB feng­ust þær upp­lýs­ingar að atkvæða­greiðsla færi vel af stað. Að henni standa 17 aðild­ar­fé­lög, ýmist er kosið raf­rænt eða skrif­lega og heild­ar­tölur um þátt­töku liggja fyrir á fimmtu­dag­inn.