Ný könnun markaðsrannsóknafyrirtækisins MMR sýnir fylgisaukningu hjá Sjálfstæðisflokknum um þrjú prósentustig, á sama tíma og Viðreisn, keppinautur Sjálfstæðisflokkins á hægri væng stjórnmálanna, tapar 2,7 prósentustigum.

Á sama tíma eykst fylgi Vinstri grænna um tvö prósentustig, upp í 10,7%, sem er ríflega sex prósentustigum minna en í síðustu Alþingiskosningum 2017.

Stuðningur við ríkisstjórnina fer upp í 41,9%, sem er meiri stuðningur en við síðustu fjórar ríkisstjórnir að sama tíma liðnum eða minna.

Á sama tíma fellur Samfylkingin um 1,5% í stuðningi, niður í 15,1%, og Miðflokkurinn fellur um 1,8%, í 13,3%. 

Athygli vekur að Sósíalistaflokkur Íslands styrkir stöðu sína og nær fimm prósenta þröskuldnum til að ná fólki inn á þing. Forsenda þess að eiga rétt á jöfnunarsæti í alþingiskosningum er að hafa fengið 5% fylgi.

Fylgi flokksins mælist 5,3 prósent, en mældist 4,9% í síðustu könnun MMR í janúar. Sósíalistaflokkurinn hefur áður mælst mest með 5,3% í Þjóðarpúlsi Gallup í janúar í fyrra en hefur mælst með minni stuðning þar til nú. Sósíalistar fá meira fylgi en Flokkur fólksins, sem náði fjórum þingmönnum inn á þing 2017, en tveir þeirra gengu í Miðflokkinn. Þá vantar Sósíalista aðeins 1,5 prósentustig til að ná Framsóknarflokknum í fylgi.

Sjálfstæðisflokkurinn mælist nú með 22% fylgi en fékk 25,2% atkvæða í síðustu alþingiskosningum. Það er sögulega lágt hjá flokknum.